震驚全港甚至全球嘅八二三慘案事隔超過一星期嘞，終於見到一個「失蹤者」重回人間。邊個失蹤者呢？咪就係食衞局局長周一嶽囉。案發至今一直失蹤嘅周局長，尋日連同署理行政長官唐英年以及醫管局主席胡定旭，一齊走去屯門醫院探望頭部重創昏迷嘅梁頌學，一面感激醫院悉心照顧，一面多謝市民支持關心，又形容梁太堅強冷靜，仲話當局會盡力幫呢一位鐵人媽媽處理問題。
老老實實，今次發生慘不忍睹嘅屠殺香港旅行團人質事件，特區政府整體表現都算難能可貴。一來反應相當迅速，冇晒平時蝸步龜速慢三拍嘅陋習；二來言行大方得體，起碼唔似得菲律賓總統阿基諾三世咁輕佻吖；三來咯喎，有情有理有節，個個高官眼濕濕哀悼同胞之餘，又識得恰如其分追究菲律賓救人不力嘅責任，仲派出香港警察飛過去蒐集證據。
十年逢一閏，人人有分加，好可惜，唯獨是周一嶽要減分。喂，危急關頭，港難當前，全人類都取消休假同外訪，返回工作崗位隨時候命啦，周局長居然按照原定計劃放假喎，事發翌日已經嗖一聲飛咗去遊埠。
好似曾蔭權咁吖，本來要去福建出席泛珠三角論壇，唔去嘞；又好似唐英年咁吖，本來要去歐洲推廣西九文化區，唔去嘞；再好似商務及經濟發展局局長劉吳惠蘭咁吖，人已經上咗飛機去丹麥同瑞士訪問，一收到消息話有大災難，即刻急急腳掉轉頭飛返香港。美中不足嘅就係，香港人團結一致渡難關，周局長獨善其身玩失蹤，玩呀玩，玩呀玩，玩到尋日先至蒲頭。
周一鑊呢個綽號的而且確唔係浪得虛名，平時周周孭一鑊都算嘞，家陣有一個大好機會畀你攞分，表現一下救苦救難嘅人性，竟然咁都要失分。
功夫茶都唔想過分苛責周局長，事關馬尼拉恐怖槍聲搞到香港人好傷好痛好悲哀，要鬧都鬧爆菲律賓特蠢部隊啦，唔好內訌吖嘛。不如咁啦，為港難家屬打打氣之餘，順便為失蹤局長加加油。計功夫茶話齋，周一嶽真係要好好學習，有眼你睇㗎啦，笨蛋其實都可以立功㗎。以前唔識派包機去泰國接滯留當地嘅香港人返屋企，今次識得第一時間接遇難者回家。以前唔識或者唔敢義正詞嚴向外國政府交涉，今次終於有勇氣直接打電話要求總統保證人質安全，人哋遲遲唔覆你電話係另一回事。
事件之中最令人感動嘅係家破人亡嘅梁太，尋日梁頌學嘅主診醫生方道生讀出梁太寫畀香港人嘅信，佢話唔想再見到港人為佢哋傷心流淚，希望大家堅強起來過正常生活，佢會默默記住大家嘅祝福同鼓勵。
講真，雖然事隔超過一星期，八月二十三日死亡直播相信仍然縈繞好多人心靈，哀傷情緒一時三刻未必可以平復。功夫茶誠心祝願梁頌學早日康復，等梁太可以真真正正堅強起來過正常生活。
總而言之，全港同胞撐你哋！