考考大家，假如你有近視，戴咗眼鏡之後仲算唔算近視一族？再考考大家，假如你不幸跌跛一隻腳，必須以輪椅代步，你仲算唔算跛腳一族？正常地球人類一定會話，戴眼鏡唔代表冇近視，坐輪椅唔代表冇跛腳，邊有人問啲咁愚蠢嘅問題㗎，返火星啦！
呢嗱嗱嗱，唔好以為功夫茶最近睇得菲律賓特蠢部隊新聞太多，無端端沾染蠢氣。其實咁樣問係有必要嘅，事關社會福利署似乎唔係正常地球人類，佢哋竟然認為，失聰人士只要戴上助聽器就唔再算係傷殘一族！
有一位八十高齡嘅謝伯伯聽覺有缺陷，所以老早已經向社署申領傷殘津貼，本來一直都冇乜問題。匪夷所思嘅事喺○七年發生，社署幫謝伯伯買咗助聽器之後，每個月千幾蚊嘅傷殘津貼忽然之間取消咗。換句話說，社署認為一個人只要戴上助聽器就唔係失聰人士，再冇資格領取傷殘津貼，你話係咪荒謬到極？
咦，咪住先，功夫茶諗起另一單荒謬個案。○八年喎，有一位李先生坐住輪椅山長水遠走去立法會請願，原來呢位躉船工人遭遇工傷意外，被迫做手術切除右小腿，跛咗一隻腳嘅佢諗住向社署申請傷殘津貼啦，點知不可思議地被無情否決。原來官僚到唔恨嘅社署認為李先生唔符合「失去百分百工作能力」嘅嚴重傷殘定義，根據醫管局評估，佢只不過「失去百分之八十五工作能力」啫。
唉，都話社署似乎唔係正常地球人類㗎啦，功夫茶思疑佢哋應該係「腦筋殘障」，本來都有打算申請傷殘津貼嘅，但係唔符合「失去百分百思考能力」嘅標準，所以咪冇資格自己益自己囉。
咁僵化嘅標準係點計出嚟嘅呢？功夫茶確係唔知，淨係知道你一旦被評定擁有百分之唔知幾多嘅工作能力，你就變咗地獄黑仔王。譬如話，有一位九十三歲嘅李伯伯，耳又聾，眼又矇，行動不便周身病痛，社署居然話佢有五成工作能力，所以又係冇資格申領傷殘津貼。
喂，人哋已經係接近一百歲嘅人瑞，即使真係有五成工作能力，唔通你叫風燭殘年老人家手騰腳震出街打工搵食咩？唔該社署唔好咁冷血啦，殘酷對待傷殘長者好缺德㗎！
謝伯伯同李伯伯嘅個案相信只係冰山一角，協助兩位老人家嘅律師陳捷透露，平均每月都接獲兩至三位傷殘人士求助，控訴社署同醫管局剝削佢哋應有權利。
計功夫茶話齋，社署署長聶德權除非能夠證明自己「百分百腦殘」，否則只要尚餘百分之唔知幾多思考能力，理得你係百分之一，都有必要從善如流撥亂反正，痛改官僚僵化嘅前非，唔可以餐餐玩殘傷殘人士，特別唔做得百般阻撓老人家安享晚年。
之不過咁，萬一聶署長的而且確思考能力等於零，咁就麻煩特區政府另聘高明，最多額外醒一筆退休金，當做另類傷殘津貼囉！