環保變靠害 學生捱貴飯

好心辦壞事可以原諒,之但係,如果政府部門因為做嘢唔經大腦,監管失職,搞到同學仔一開學就要捱貴飯,咁就一定要興師問罪囉。

點解功夫茶咁慶?話說港府使咗四千幾萬公帑,資助本港三十六間中小學喺新學年推行環保午膳計劃,畀學校進行改裝工程同埋添置餐桌、餐椅、翻熱食品及洗滌設施,以便推行「現場派飯」。點知環保變靠害,「現場派飯」變咗現場起價,部分學校餐費貴咗一成。

又會咁搞笑嘅?環保同飯餸根本係兩樣嘢,何解會扯埋一齊?原來又係官府整色整水攞嚟衰。嗱,呢個計劃原意係透過現場派飯服務,減少使用即棄餐具嚟推動環保。弊在幾宏偉嘅規劃由班官僚去落實,一定變晒調,走晒樣。

呢嗱,負責學校廚房改裝嘅機電工程署做嘢求其,部分工程質素差強人意唔在講,成個計劃實施過程監管甩漏,教育局闊佬懶理,任由部分學校對午膳供應商獅子開大口,間接導致餐費狂升,家長同學生未見其利先受其害。

開講有話,呢個世界冇免費午餐,環保午餐一樣有代價。有學校收咗政府資助之後,仲乘機巧立名目向供應商收取租金、冷氣費甚至風扇費同屏風費等。有啲學校要人哋每月畀三萬蚊租金,簡直同搶冇乜分別。

在商言商,咁嘅生意搵鬼做咩!有供應商話到明,如果符合學校招標書嘅要求,每年至少要投資二十萬,擺明要蝕本,索性連標都懶得投;亦有供應商話迫於無奈,焗住要做,但羊毛出在羊身上,會將增加嘅費用轉嫁畀家長;有啲話,就算本學年唔加,明年最少都會加一成。

好地地一個環保計劃搞到唔湯唔水,陷入三輸局面。供應商畀人明搵笨,家長增加咗負擔,因為供應商減少,學生飯餐嘅選擇相對少咗,甚至可能因為將貨就價,連食物質素都可能受影響,你話當局係咪靠害呀!

講真,中央派飯既環保,又減少浪費,更可以畀同學食到新鮮熱辣嘅飯菜,如果當局實事求是咁推廣,考慮周詳,對改裝工程又有足夠監管同跟進,本來可以收到好好嘅效果。

當初計劃推出,學校反應已經麻麻。有校長話,校園地方細,難以搞中央派飯,「唔係搞個計劃畀人睇就叫做好」。弊在當局後知後覺,純粹為咗做場環保騷,一於少理,匆匆推行。

既然要做就要做到好好睇睇,但港府一味諗縮數,正如有關注組織負責人話齋,用「刀仔鋸大樹」嘅心態推行措施,佢出豉油要供應商出雞,對學校收費冇監冇管,卒之搞到一鑊泡。

唉,港府一向將環保當做騷,開頭永遠係威係勢,到頭來又係爛尾收場。用徵收膠袋稅、「停車熄匙」呢類效果成疑嘅措施嚟擾民仲嫌唔夠煩,學校現場派飯又無端端累到學生捱貴飯,咁嘅環保,早啲收皮罷啦!