政府迫遷，廢料回收業陷入絕境！繼九龍區廢紙回收商計劃慢駛抗議當局迫遷後，又有一批位於將軍澳百勝角嘅回收商因租約期滿，面臨執笠厄運，逾百工人隨時失去飯碗。最令人擔心嘅係，由於當局步步進逼，趕盡殺絕，整個回收業日趨萎縮，隨時無以為繼。
件事係咁嘅，六間回收公司多年來一直以短期租約形式喺百勝角經營，大家相安無事，早前接到地政總署通知，話租約即將到期，必須於八月底清場。本來呢，塊地係政府嘅，當局計劃收番作其他用途，都無可厚非嘅，問題係，當局又點安置呢批回收商呢？
回收商同當局商量，希望可以喺同區繼續經營，點知當局卻建議佢哋搬去北區或者西貢喎。唉，咁即係叫佢哋執笠啫！係人都知，回收公司一定要靠近垃圾堆填區先至可以經營，北區話就話有堆填區，但廢料車根本唔會山長水遠開入去，至於搬去西貢咯喎，淨係營運成本就要增加成三分二，更加冇得做。你話喇，當局呢招係咪等於將回收公司趕盡殺絕吖？
所以話，港府經常講一套做一套，表面上支持回收行業繼續做落去，實際上關人個關。以九龍區廢紙回收業為例，成個行業涉及嘅廢料收集員、運輸人員等，共有六萬幾個職位，每日處理幾千噸廢紙，唔止對就業市場有幫助，對環保亦有好大貢獻添。呢批回收商本來做得好地地，點知當局失驚無神迫遷，但又提供唔到適當嘅地方畀佢哋繼續經營，令佢哋面臨結業困境，幾萬人飯碗難保。回收商多次同當局交涉都解決唔到問題，惟有以實際行動抗爭，計劃發動一百五十架車慢駛遊行，到時分分鐘又搞出個大頭佛。
話時話，廢料回收業唔同其他行業，除咗可以提供大量就業職位之外，最緊要係有助環保，港府唔單止冇好好幫助佢哋經營，仲成日為難佢哋，甚至想將佢哋趕盡殺絕，究竟搞邊科㗎？潮流興環保，各國政府都積極扶持廢料回收行業，大力開展循環再用，反觀港府班高官，淨係識得齋叫環保口號，講多過做。正如業界人士踢爆，「政府淨係得把口，但係就冇幫過我哋呢啲實質做嘢嘅人」。
其實，業界人士曾經提出好多改善回收業嘅措施，例如利用天橋底做中途站，回收廢紙廢鐵，既可以吸收更多棄置物資，又可以節省運費，可惜當局諗都唔諗就否決咗。唔怪得區議員怒轟官員目光短視，扼殺回收業生存空間。
正所謂「夏蟲不可語冰」，喺港府高官心目中，可能以為廢料回收業係單純嘅商業經營，所以「積極不干預」。佢哋從來冇諗過，如果回收業有得做，對環保工作有好大幫助，就以香港嚟講，每日製造咁多垃圾，如果冇回收公司回收後循環再造，再多幾個堆填區都唔夠用喇。港府官員鼠目寸光，香港想唔變臭港都幾難！