惡人有惡報，唔到你唔信。呢嗱，狂鬧內地團友，被網民形容為「母夜叉」嘅香港導遊李巧珍終於自嘗苦果喇。旅遊業議會規條委員會尋日裁定，即時撤銷阿珍嘅導遊執照，僱用佢嘅旅行社亦被罰款四萬七千五百蚊。
出嚟行，預咗要還，惡導遊被釘牌可以話係意料中事。身為導遊，強迫旅客購物不果，居然口出惡言，威脅團友唔畀食宿，成個過程畀人影埋相放上網，喺內地臭名遠播，搞到本港旅遊業個朵亦臭埋，阿珍被釘牌完全係咎由自取。正如佢自己話齋：呢世唔還，下世都要還。其實都唔使等到下世嘞，依家就現眼報喇。
之不過，如果以為釘咗阿珍牌，旅遊業從此雨過天青，可以同醜聞絕緣，旅客唔使再擔心畀人劏，咁就太天真太傻咯。係人都知，本港旅遊業劏客醜聞無日無之，阿珍之不過係冰山一角嘅咋。呢，同一間旅行社另一位女導遊，亦係因旅客消費唔夠而發爛渣，狂鬧旅客「好狗不攔路，好人不擋財」，尋日亦被旅議會罰停牌三個月。
旅遊業醜聞不斷，主因係零團費、負團費呢啲深層次問題引致，當局唔對症下藥，淨係罰導遊呢啲小角色又有乜嘢用吖。導遊花言巧語，甚至惡形惡相強迫旅客購物，影衰香港，固然要承擔責任，但唔等於旅行社冇責任，更加唔等於監管失職嘅政府部門可以甩身。
旅議會淨係搵導遊開刀，正一係唔捉大魚只捉蝦毛。涉及導遊嘅劏客醜聞爆完一鑊又一鑊，如果唔加強監管，唔改變旅遊業生態，阿珍絕對唔會係最後一個惡導遊，至怕當局做完呢場大龍鳳之後，旅遊業惡習依舊，醜聞難絕，試問旅議會又釘得幾多個牌呀？
講嚟講去，問題出在旅遊業現行嘅運作機制七國咁亂，各自為政。政府旅遊事務署只負責旅遊設施同政策，旅發局只負責宣傳推廣，負責監管嘅係屬於業界自律組織旅議會。真係唔明，澳門咁細地方，政府都設有一個旅遊局，香港居然冇一個可以統籌旅遊業監管嘅政府部門。
旅議會自己人監管番自己人，結果會係點，大家心照喇。嗱，涉事嘅安徽旅行社被當地旅遊局重罰十萬元人民幣，但僱用阿珍嘅本港旅行社罰款竟然遠遠少過內地，而且呢間旅行社嘅導遊已多次被投訴強迫旅客購物添，問你服未？
業界自律變放任自流，預咗啦。話時話，旅議會呢個「監管機構」根本係無牙老虎，並冇執法權力，就算業界發生乜嘢醜聞，影響有幾惡劣，旅議會除咗釘牌同罰款呢兩招，其他乜都做唔到。你估政府睇唔到呢啲問題咩？佢哋睇得比任何人都清楚，不過詐傻扮懵啫嘛。
唉，當局用嚟宣傳推廣香港嘅錢愈來愈多，但旅遊業嘅形象就愈來愈差，納稅人真係冤枉。計功夫茶話齋，如果當局繼續闊佬懶理，唔監唔管，咁不如慳番啲錢好過喇！