護士通常愛心爆棚，所以又叫白衣天使。護士有時更加係智勇雙全，好似菲律賓八二三慘案咁吖，任職護士嘅傅太就非常機警嘞，獲釋之時「認親認戚」順手帶多一位小朋友離開被騎劫嘅旅遊巴，贏得全城拍爛手掌。不幸嘅係，傅太救得出人哋嘅小朋友，救唔到自己嘅好丈夫，實在令人黯然神傷。
所以咯喎，護士係值得尊敬嘅，尤其係當你病到五顏六色有需要入院治療嘅時候，白衣天使隨時係你嘅救命恩人。之但係，家陣持續出現一個非常頭痛嘅問題，公立醫院護士不斷大逃亡，人手短缺相當嚴重。萬一閣下唔覺意做咗病人，瞓喺醫院居然搵唔到護士幫手，嗰種恐慌睇怕同被挾持人質遲遲未獲救不遑多讓。
醫管局總護理行政經理馮玉娟透露，上年度整體護士流失率由○七至○八年嘅百分之四點五，回落至百分之四點一，但係港島區護士流失仍然嚴重，以瑪麗醫院為龍頭嘅港島東聯網流失率達百分之六點一，創近三年新高。
嘩，大佬，百分之六點一流失率唔係講笑㗎，一百個樽冇咗六個蓋，左冚右冚梗係甩甩漏漏㗎啦。最令功夫茶擔心到騰騰震嘅係，你知啦，香港公立醫院近年唔知係咪撞邪，醫療事故多到嚇死人，盂蘭節鬼古都冇佢咁恐怖，一時話打錯針，一時話開錯刀，一時話輸錯血，少咗大量護士為病人提供服務，會唔會手忙腳亂害死更多病人㗎？盂蘭節燒衣會唔會多咗幾隻鬼爭食㗎？
咦咦咦，咪住先，其實唔止護士大逃亡，連醫管局行政總裁蘇利民都以私人理由劈炮，話要返祖家澳洲照顧岳父大人喎，至今仍然未搵到替工。咁即係點？阿頭有阿頭鬆人，天使有天使起錨，仲未計醫生其實一樣人手短缺，捉襟見肘之下病人有乜保障呀？
醫管局話喎，推出三招挽留護士方案，包括將申請跨聯網調職嘅護士解凍，培訓手術室助理減輕護士工作，以及向政府獻計增加專科護士培訓名額。計功夫茶話齋，三招之中只有兩招比較有用。你准許護士跨聯網調職，應該可以減少由於調職不成而索性辭職，增加專科護士培訓名額更加係合情合理啦，不過一時三刻未有咁多人畢業咁解啫。至於培訓手術室助理減輕護士工作，呢家嘢就唔係咁樂觀嘞，畢竟助理始終唔係護士，一如護士始終唔係醫生，你冇可能亂點鴛鴦吖嘛。立法會衞生服務界議員李國麟都話啦，手術室助理不能取代護士，而且擔心日後因慳資源而增聘助理，減聘護士。
唉，愈講真係愈得人驚，既有總裁職位懸空，又有護士職位懸空，醫生更加做到七手八腳一頭煙，有開工，冇收工，難保日後唔會出現一個咁嘅騎呢廣告：「醫管局誠聘大量人手，應徵者學歷不拘，無需經驗，職位任揀，智商不低於一百者優先考慮。」
點都好啦，麻煩仲未劈炮唔撈嘅食衞局局長周一嶽醒醒定定，絕對唔可以搞到香港醫療系統步上菲律賓特蠢部隊後塵，否則咯喎，你個局長職位都要懸空！