爭奪遺產大家聽得多，如果牽涉億萬富婆加一碌神棍，更加可以話係世紀爭產案添，之但係，大家有冇聽過強搶遺產？話時話，功夫茶都係第一次聽，聽落覺得仲有少少共產味道。
呢嗱，係咁嘅，原來香港有一條《無遺囑者遺產條例》，政府有權沒收無人認領嘅遺產。假設閣下百年歸老，無兒無女冇人冇物無親無故，唔知點解又冇立遺囑，好好彩又冇哨牙風水佬自稱係你生前嘅姦夫，咁你嘅遺產就「歸公」㗎喇，撥歸公家庫房咁解。原來喎，每年大概都會有成萬宗類似個案，由○七年至今，政府發咗四千二百萬元意外之財。
無人認領嘅遺產就歸公，你話係咪共產吖？難怪成日有人懷疑特區政府潛伏大量共產黨員，包括盤據行政會議以及立法會嘅重要成員。
好嘞，共產啫，咁又同強搶遺產有乜嘢關係？要解答呢個問題，首先要睇睇一項有益有建設性嘅提議，社福機構以及慈善團體認為，無人認領遺產冇理由益政府嘅，應該取之於民、用之於民、還富於民，利用相關款項成立基金扶助弱勢社群先至啱數。如果政府從善如流，真係成立基金濟世為懷，當然一天都光晒啦；不過，政府居然耍手擰頭，點都唔肯順應民意，夾硬狡辯話撥歸庫房已經能夠惠澤社群。你話嘞，官老爺係咪強搶遺產吖？
打個譬喻，每年一萬個冇立遺囑而撒手塵寰嘅市民就係小甜甜，遺產本來係可以攞去做善事嘅，絕對符合小甜甜意願，哈，突然有個光頭佬跳出嚟話，交畀我啦，交畀我一樣可以幫全港七百萬市民祈福嘅啫，保你老少平安闔家富貴添。家陣嘅特區政府，咪似足呢個祈福黨光頭佬囉！
浸會大學社會工作系系主任黃昌榮就講得啱嘞：「四千幾萬話多唔多，話少唔少，若政府帶頭成立基金，可以起到鼓勵作用，令更多人願意死後將財產捐出作慈善用途。」黃昌榮又建議善款投放於老人醫療福利以及善終服務，事關大部分無人認領嘅遺產來自老人家，款項用嚟敬老最適當。
講到呢度，功夫茶奉勸廣大市民，大吉利是講一句，萬一有乜冬瓜豆腐遺產歸公好冤枉㗎，所以咯喎，預早立番一份遺囑穩陣少少，益阿貓阿狗都好過益政府吖嘛。聽講只要內容唔係太複雜，搵律師立遺囑唔係好貴㗎咋，幾千蚊有交易。當然啦，若然閣下財富級數媲美小甜甜，律師費都幾和味。不過，律師費貴一貴都係值得嘅，點都好過出現世紀爭產案，一個唔覺意益咗呃神騙鬼嘅街外人，更加冤哉枉也。
三年就有四千二百萬無人認領嘅遺產，十年肯定過億，用嚟做善事確係功德無量㗎。唉，政府鐵石心腸，善款見財化水，弱勢社群苦不堪言。都係嗰句啦，難怪兩岸四地各個政府之中，香港特區政府係最乞人憎嘅一個！