吓？即將入伙嘅將軍澳新樓盤日出康城二期領都醞釀蝕讓危機？唔係啩，啱啱先至話樓市暢旺，所以政府出招撳住個市，唔通一出招就冧市？政府冇咁勁啩，假如真係冧市，最頭痕嗰個應該係曾蔭權，大批有貨揸手嘅小業主包圍禮賓府都似。
睇真啲，哦，明白晒，原來又係《蘋果日報》刻意唱衰城中首富。事關領都係長實旗下物業，而長實一向都唔會喺爛果報落廣告，煩過烏蠅嘅壹淫媒咪死纏爛打玩針對囉。
爛果報所謂報道係咁講嘅，去年七月有人以四百一十七萬六千元購入領都其中一個九百七十平方呎單位，最近以四百零一萬六千元沽出，蝕百分之三點八，所以就係「醞釀蝕讓危機」嘞。
唔知嘅畀佢嚇死，知嘅就畀佢笑死。喂，由二○一○年一月至今，領都錄得六十八宗二手成交，約九成四屬獲利個案，帳面獲利幅度最高超過一成八，只有四宗蝕讓；如果淨計五月，九宗成交八宗有錢賺，最高升幅超過一成添。絕大部分獲利成交你唔提，只係攞一個蝕讓單位做例子就發到大一大，呢啲咪就係叫做斷章取義兼夾無限上綱囉！
唉，講開爛果報真係好鬼死無聊，餐餐咬住長實唔放。最好笑嘅係，壹淫媒一次又一次唱衰長實旗下將軍澳樓盤臭味問題嚴重，偏偏壹淫媒總部就係位於將軍澳，更加接近堆填區。你話嘞，話人臭者自己係咪更臭？
講到呢度，功夫茶諗起一則《伊索寓言》，狐狸想摘樹上嘅葡萄，可惜笨手笨腳失敗咗，狐狸就發晦氣咁話嘞，唓！葡萄係酸嘅，真係唔稀罕呀！
大家不妨根據呢一隻狐狸發揮一下創意，講一講《乞兒寓言》。從前喎，有一個爛身爛勢乞兒仔，躝咗去一戶有錢人家門口，乞兒仔當然擘大喉嚨乞米啦，又老爺又奶奶，又三跪又九叩，可惜有錢人家嫌佢污糟邋遢，始終唔肯開門施捨幾個發財錢。卒之，乞兒仔老羞成怒發爛渣，十八字粗口連珠炮發，十八代祖宗備受騷擾，乞兒仔最後一嘢扽落地扁晒嘴發晦氣咁講：唓！銅板係臭嘅，真係唔稀罕呀！
即係咁，長實唔喺爛果報落廣告吖嘛，即係唔肯開門施捨幾個發財錢囉。長實嘅將軍澳樓盤點解會有臭味問題呀？唔係因為堆填區，而係因為乞不到的銅板是臭的。
唉，壹淫媒如假包換真係煩過烏蠅o架，春秋二祭個個走去拜先人嘅山，佢就搵幾條茂里去掃人哋嘅場，左搞搞右搞搞，無中生有乜都搞。喂，拜祭先人係應該莊嚴肅穆o架，搞到烏煙瘴氣好陰騭啫！
咦咦咦，《乞兒寓言》其實可以有一篇《乞兒外傳》。從前喎，東家唔乞乞西家，乞兒仔走咗去另一戶有錢人家乞米，今次攞到幾個發財錢嘞，點知施主一個唔覺意放咗個屁，忽然見到有人豎起兩隻拇指大讚一句：好香！
話時話，樓市呢家嘢，好的衰不了，衰的好不了，與其聽爛果報生安白造發噏風，不如自己密切留意市況好過啦！