咦咦咦，衞生署終於肯補鑊咯喎，檢討同修訂私家醫院嚴重醫療事故呈報系統，通報事項與公立醫院看齊，而且會每季公布私家醫院嚴重醫療事故數目。
嗱，咁咪乖仔囉，衰就要認，打就企定，唔好餐餐黑箱作業吖嘛，醫死人都唔出聲，好冇品啫。
如果大家唔明衞生署到底補緊乜鑊，就等功夫茶同大家補番一課。呢一課叫做衞生署長期包庇私家醫院，你話係典型嘅「官商勾結」應該都唔會錯得去邊。
即係咁，申訴專員公署早前調查發現，原來衞生署老早同私家醫院有「口頭承諾」，如非必要唔會公布闖禍醫院嘅名稱。拍心口承諾唔做金手指點名邊間私院出事已經離譜㗎啦，更加神化嘅係，口頭承諾名副其實只限於口頭，協議內容全無白紙黑字紀錄。申訴專員公署就話嘞，咁嘅做法絕不理想，衞生署應該盡快改善。
簡單咁講，衞生署好比一個慈母，私家醫院就係敗兒，不肖子孫無論幾敗家，佢老母點都會護短，打死都唔肯大義滅親供佢出嚟接受藤條炆豬肉嘅應得懲罰。某甲醫院有孕婦死亡咩？外人唔知㗎。某乙醫院有胎死腹中咩？蒙在鼓裏㗎。某丙醫院有病人離奇去世咩？除非家屬主動踢爆，或者死者含冤報夢，否則全人類一頭霧水。
好嘞，既然申訴專員公署要求衞生署改善，即係提高透明度啦，所以就有今次嘅補鑊措施。問題係，肯補鑊啫，唔一定等於補到鑊喎。睇真啲所謂補鑊措施，超！搵笨！
原來呀，衞生署話喎，主動公布只涉及公共衞生嘅重大事項，個別事故任由私院自行決定。老細，乜嘢叫做「重大事項」呀？唔通要沙士瘟疫蔓延時先至叫做重大？莫非庸醫斷錯症害到人哋一屍兩命就唔係重大？如果累到無辜市民家破人亡都唔算重大事項，功夫茶想問一句，類似明愛醫院見死不救嘅醫療事故係咪瞞得就瞞呀？如果你話死一個兩個人唔算重大事項，功夫茶真係唔知講乜好，諗來諗去只有四個字：冷血無情！
喂，文明社會係會尊重每一條生命嘅，你只要唔知點解失驚無神搞到一個人魂歸天國，你就有必要承擔責任。衞生署如果藉口「不涉公共衞生重大事項」而容許私家醫院瞞天過海，等人哋死得不明不白，莫講話唔符合文明社會嘅標準，簡直同第三世界嘅野蠻部落冇乜分別。
所以話啫，黑箱繼續係黑箱，唯一有少少唔同嘅係，黑箱作業系統家陣開咗一個窿仔，可以畀你兩眼咁解。
咁嘅所謂提高透明度，擺明就係搵老襯啦，成個呈報系統根本換湯不換藥，衞生署依然包庇，私家醫院大可繼續瞞報醫療事故，同舊時分別唔大。
計功夫茶話齋，假如申訴專員公署都覺得成為一個被搵笨嘅傻仔，咁就唔好放過衞生署喇，一於死咬不放，咬到佢真真正正拆咗個黑箱為止！