醫管局○五年起推行藥物名冊制度，將大批貴藥列為「自費項目」，擺明車馬打劫病人。結果五年苛政兩茫茫，搞到窮病人無錢醫病，中產病人傾家蕩產。聖雅各福群會尋日公布「長期病患者購買自費處方藥物」調查報告，列出一系列藥物名冊下嘅人間悲劇，有人帶病搵工幫補藥費，有人無錢買藥白白等死，簡直可以改名做「醫局苛政害人實錄」。
實錄一：莊女士○四年確診乙型肝炎，本來由公立醫院免費提供藥物，但自從○五年推出藥物名冊後，所用藥物變咗「自費項目」，現時每月藥費高達二千五百蚊。由於家境貧困，積蓄有限，現年五十九歲嘅莊女士被迫帶病搵工，希望可以勉強維持落去。
實錄二：六十二歲嘅甘先生每月僅靠三千幾蚊綜援生活，無奈幾年前確診乙型肝炎，扣除租金同睇病開支後，每月剩番二百幾蚊開飯。雖然醫生建議佢採用每月一千五百蚊嘅自費藥物，但佢一直無錢買，眼白白睇住自己病情惡化，隨時變成肝硬化甚至肝癌。
同類悲劇林林總總，不能盡錄。難為啲醫療高官當年仲誓神劈願咁話，藥物名冊制度下，絕對唔會出現「無錢無藥醫」嘅情形。但上述調查顯示，多達三成七病人無按醫生建議購用自費藥，其中九成二承認係基於經濟問題，有人甚至將一粒藥丸分兩次「慳住食」。功夫茶想問問高官，咁唔係「無錢無藥醫」又係乜嘢呢？
喺香港咁富裕嘅地方，竟然成日發生呢種「因財失救」嘅悲劇，睇嚟，見利忘義嘅公共醫療真係有病。且待功夫茶望聞問切，原來藥物名冊只係其一，更離譜嘅係醫療融資呢個大毒瘤，企圖將醫療負擔轉移到市民身上，喺食衞局局長周一嶽主診下，呢個醫療融資最近忽然病變，改叫「全民醫保」，但係打劫市民嘅嘴臉一成不變。
令人悲喜交集嘅係，見到醫管局見死不救，聖雅各福群會、藥劑師學會同藥廠合力開辦「惠澤社區藥房」，以優惠價為貧窮病人提供藥物。計功夫茶話齋，呢個社區藥房既係人間有情嘅表現，亦係官僚無情嘅見證。大家不妨想像一下，一個坐擁幾千億財儲嘅政府，竟然要由民間變相補貼公共醫療藥物開支，咁嘅富貴乞兒政府，除咗香港都幾難搵到！
來來來，周一鑊，無良就無良到底！既然公共醫療「經費短缺」，醫療融資天怒人怨，而裁減高層冗員又違反你哋肥上瘦下、疊床架屋嘅終極原則，倒不如定期舉行慈善匯演，向民間籌集醫療經費，先由周一鑊高歌一曲《萬惡淫為首》，再由醫管局總舵主蘇利民上台表演心口碎大石，功夫茶帶頭認捐一蚊，畀你班草菅人命嘅醫療庸官！