一提起家庭計劃指導會，大家會諗到乜？唔使多講，梗係同食色性也嘅避孕事宜有關㗎啦。有兩樣嘢係家計會最深入民心嘅，第一樣嘢係事後丸，旺季首推平安夜失身夜嘅聖誕節；第二樣嘢係廣告歌，相信連八十後男男女女都聽過：一個嬌，兩個妙，三個吃不消，四個斷擔挑。當然啦，打從憂慮人口老化嘅曾蔭權公開呼籲「最好生三個」之後，「兩個就夠晒數」嗰支歌仔已經冇唱好耐。
既然一提起家計會就諗起避孕，所以上一代好多熱烈響應兩個夠數論嘅市民自自然然幫襯家計會，唔似得今時今日梗有一間喺左近嘅便利店大量提供避孕套。家計會其中一個避孕方法叫做子宮環，誠屬女士們放膽去做愛做之事嘅體貼恩物。之不過咁，體貼即係貼體，由於子宮環名副其實真係好體貼，所以就出現一宗悲劇，現年六十一歲嘅黎女士遭受四十年長期腹痛折磨之後發現，懷疑家計會當年將該拆而未拆嘅子宮環殘留喺佢體內！
成件事係咁嘅，早於一九六九年黎女士已經係兩個小寶寶嘅媽媽，因為兩個就夠晒數吖嘛，所以去咗馬頭涌道家計會佩戴子宮環，可惜之後仍然再度懷孕。眼見避孕工具竟然避唔到孕，黎女士返去家計會要求拆除。接住落嚟簡直係一場災難，黎女士不斷覺得腹痛，連正常性生活都大受影響，睇極醫生都唔知點解。四十年春去秋來，終於去到舊年，黎女士因為坐骨神經痛而向骨醫求診，照過Ｘ光之後有驚人嘅意外發現，盆腔之內居然有蚊香狀異物，後來證實係舊款子宮環。
呢嗱嗱嗱，你話係咪慘絕人寰嘅悲劇吖？避孕失敗都算嘞，人哋要求拆除子宮環，家計會又拆到烏厘單刀，最可惡嘅係刻意隱瞞，就咁打發黎女士。
好嘞，家陣真相大白，可唔可以做手術將子宮環攞番出嚟呢？唔係話唔得，不過醫生解釋，由於無法肯定準確位置，所以要劏開肚皮撥開脂肪左搵右搵。換言之，手術風險比較高，做手術唔係咁化算。再換言之，黎女士有生之年都要同一個殘留體內嘅蚊香狀異物共存亡。
呢單畸屎好明顯係醫療失誤，家計會照道理講點都要負責，之但係，你估佢哋有乜表示吖嗱？家計會發言人話喎，由於事隔四十年已經搵唔番黎女士嘅資料，所以不能斷定是否有子宮環遺留體內。
唉，官僚，又係熟口熟面嘅官僚，呢家嘢係香港官僚主義普遍流行嘅三不作風：不負責，不道歉，不賠償。雖然四十年無疑係相當長嘅一段時間，足夠歲月神偷洗劫資料庫，但係黎女士點都冇可能夾硬老屈家計會啩，功夫茶打死都唔信有人可以將外來異物塞入自己個肚然後含血噴人。
好心家計會稍微發揮一下問責精神啦，香港已經證實係一個不和諧社會，任何一單荒謬事故都足以煽風點火。異物殘留體內明明係多得你靠害，最低限度都應該負責受害人日後嘅醫療開支吖嘛，如果闊佬懶理不聞不問，功夫茶有一個不良預感，五月天多雷暴，小心畀雷劈呀！