去公立醫院睇急症要等幾耐？兩粒鐘？三粒鐘？以前就係，依家？講出嚟都冇人信，答案係隨時等足十幾粒鐘，問你服未！
咪住！等十幾粒鐘？家陣講緊急症室，唔係普通門診噃。冇錯，睇吓沙田威爾斯親王醫院急症室就知，即使三更半夜，輪候求診亦需要等九粒鐘。有位地盤工人被鐵釘刺傷手臂，居然等咗十一粒鐘仍未就診，都算係經典咯。本報記者曾於凌晨一點左右去威院急症室睇過，發現夜深人不靜，仲有過百名病人同家屬輪候緊，有啲仲要瞓喺推床上等。
急症室爆晒棚，但有病人話，只見到好少醫生當值，每小時只睇得三個病人。有病人等得唔耐煩，一度鼓譟甚至報警。唉，報警又點呀，警察又唔係醫生，嚟到都冇用啦，最多咪叫病人耐心等候。咁輪候法，同輪候專科有乜分別？
最離譜嘅係，有位未足兩歲嘅ＢＢ女跌傷後腦，媽媽帶佢去威院睇急症，點知竟被分流為非緊急個案，護士只係幫ＢＢ女貼上藥水膠布，然後叫兩母女慢慢等，結果足足等咗六粒鐘，直至凌晨四時至睇到醫生。好彩冇乜事啫，萬一ＢＢ女情況突然惡化，邊個孭鑊先？
ＢＢ女跌傷頭咁大件事都要等六粒鐘，唔怪得嗰位被鐵釘拮傷嘅地盤工人要等十幾粒鐘喇。如果咁啱撞正有重大事故發生，危急病人咪冇人理？急症室人滿為患，睇急症要癡癡地等，好明顯係醫院人手安排出咗問題，更確切啲講，係資源分配有問題，人手根本安排唔過嚟。
正如病人權益組織話齋，無論有冇突發事件發生，要病人喺急症室等九粒鐘甚至十幾粒鐘，完全唔可以接受。
話時話，公立醫院急症室逼爆不過係小兒科咋，懷疑延誤治療導致病人失救嘅畸士都唔少嘞。今年三月，有女病人因為嘔吐及腹痛送入屯門醫院急症室，雖然劇痛難忍，但淨係獲安排輪候照Ｘ光，等咗兩粒幾鐘後，翻晒白眼至送去搶救，卒之救唔番。
其實，公立醫院前線資源不足問題一直存在，唔止急症室係咁，關乎人命嘅手術室甚至深切治療部亦係咁，前線醫護做到得閒死唔得閒病，壓力爆煲，唔出事至奇。前排瑪麗醫院手術室就發生過護士集體請病假事件，手術安排大受影響，有心臟病人因為手術押後，原本三個幾鐘嘅手術要做七個鐘，病人最終懷疑因手術後遺症不幸死亡，簡直係悲劇。
唉，公共醫療資源錯配問題積重難返，前線人手嚴重短缺，正所謂巧婦難為無米炊，就算醫生護士想急都急唔嚟。明明係資源分配失當，醫管局反而成日話市民濫用急症室，根本就係本末倒置。係咁，不如唔好設急症室，叫市民以後一律要預約至可以睇急症吖，笨！