假如香煙列作毒品，咁就一天都光晒嘞，人人唔准買，個個唔准食，邊個違禁就捉去戒毒，假如係學生哥吸煙，一嘢掟去正生書院重新做人。如果真係咁，反吸煙運動就唔使做到拖泥帶水。計功夫茶話齋，吸煙刑事化先至係無煙新世代嘅正確出路。
不過可惜吖，唔知係怕事嘅政府畏首畏尾，定係偽善嘅官僚唔捨得非常和味嘅煙草稅，家陣所謂禁煙純屬一連串擾民假動作。煙民唔可以室內吸煙固然係麻麻煩煩，其實非煙民一樣咁難受，事關一去到室外就煙霧瀰漫，成條街都係煙民圍住垃圾桶「打邊爐」，路人甲乙丙熏到窒息咁滯。
好嘞，擾民假動作又獻新猷，財爺曾俊華喺佢嗰份乏善足陳嘅財政預算案提出，日後可攜帶入境嘅免稅煙數目由現時最多三包共六十支，大幅減至最多十九支，預期八月實施。一包煙唔係二十支嘅咩？點解入境上限係十九支咁零丁？哦，無他嘅，蠶蟲師爺度出聰明笨策，唔准你帶二十支，即係強迫你一定要將包煙拆開自用，冇得轉賣圖利咁解。
嗱嗱嗱，大家設身處地諗一諗，如果你係入境處職員，見到有人身上攜帶一包未拆嘅香煙，你應該鐵腕取締嚴懲法辦吖？定係要求對方即場拆開煙包戾手掉走一支？又假如，你見到有人身上攜帶一包已拆嘅香煙，內有未超上限嘅十九支煙，你應該大開方便之門放佢走吖？定係懷疑佢身上暗藏第二十支煙，一聲令下捉去剝光豬徹底搜身？
限帶十九支煙嘅建議問題多多，難怪觸發政黨不滿。自由黨零售及批發界議員方剛就批評嘞，有關政策戇居又擾民，容易令市民誤以為可以購買最多一包免稅煙入境，引起執法大混亂，情況勢如外傭稅翻版。所以方剛積極研究提出修訂，將建議改為完整一包二十支煙。民建聯贊同有關修訂，工聯會亦話可以考慮。
方剛仲話，政府一係明確禁買免稅煙，好似毒品咁一支都唔准帶入境，一係准許帶一包，唔應該好似家陣咁唔湯唔水，徒令市民混淆，隨時誤墮法網。
呢啲就係英雄所見略同嘞，係咯，點解唔當香煙係毒品一律禁止入境啫？香煙刑事化咪一了百了囉，好過騎騎呢呢庸人自擾吖。入境上限十九支煙嘅新規定真係添煩添亂㗎，煙民睇怕會同入境處職員日嘈夜嘈。
大家千祈咪以為禁煙擾民假動作個個都係輸家喎，其實有一個贏家㗎，呢個贏家嘅大寶號叫做：走——私——客！
你知啦，香港即使打正旗號禁毒，毒品照樣源源不絕，甚至幾乎全面攻陷校園，禁煙力度當然比禁毒更加弱雞，所以造就走私客無數發達機會。
點都好啦，功夫茶忠告政府，吸煙危害健康，禁煙切忌偽善，免稅十九支煙多餘嘅啫，一勞永逸嘅辦法始終係放棄可觀嘅煙草稅，將吸煙等同吸毒，咁就徹底杜絕煙禍嘞！