「免死金牌」大家聽得多，有冇聽過「免責黑箱」？今日功夫茶同大家講一個古仔。
從前喎，有一個皇帝，十分寵愛佢嘅御用神醫，專登叫人打造一個特大號皇家黑箱畀佢。黑箱作用係乜呢？就係畀御醫進行千奇百怪嘅醫學實驗，但凡有病人送入黑箱，無論係藥到病除生勾勾行番出嚟，抑或係藥石無靈死枯枯轉交仵作，外人一律唔知佢喺裏面搞過乜乜東東芫荽葱，更加唔知有冇出現過草菅人命嘅醫療失誤。因為全程黑箱作業，所以御醫絕對免責，呢個就叫做免責黑箱。
聰明嘅你一睇就知功夫茶含沙射影啦，冇錯，呢個「皇帝罩御醫故事」純屬老作，不過以下情節千真萬確。
私家醫院去年至今向衞生署呈報嘅醫療事故多達五十七宗，之但係，當中只有一宗咁大把由署方主動發稿公布，其餘個案涉及邊一間醫院無從稽考，外間閒雜人等完全蒙在鼓裏。申訴專員公署調查發現，原來衞生署一早同私家醫院有「口頭承諾」，如非必要係唔會公布出事醫院名稱嘅。更加搞鬼嘅係，口頭承諾名副其實得把口，協議內容全無白紙黑字留作紀錄。所以申訴專員公署就話嘞，如此做法絕不理想，衞生署應該盡快改善。
呢嗱嗱嗱，你話影響全港市民生死嘅衞生署係咪御賜黑箱畀私家醫院吖？理得你醫死人又好，話之你開錯刀都好，總之衞生署就好似江湖大佬關照蠱惑仔咁樣——點錯相劈錯友之嘛，得o架嘞，有大佬罩住，細佬冇有怕！
衞生署明知私家醫院發生醫療事故，居然秘而不宣，死都唔肯供出醫院名稱，大家可能會話，妖！咁即係官僚主義包庇混世庸醫啫！
計功夫茶話齋，包庇都仲係次要，最得人驚嘅係害人不淺。嚟一個假設吖，假如有醫院不斷發生懷孕媽媽一屍兩命嘅重大失誤，其他孕婦懵然不知繼續幫襯，完全唔識得買佢怕打退堂鼓，容乜易變咗送羊入虎口o架。事實上，浸會醫院就被揭發過一連串新生嬰兒無故骨折嘅個案，有理由相信，如果揭發早少少，受害人數未必有咁多。有一點大家要注意喎，揭發嘅係苦大仇深嘅受害者，而唔係醫醫相護嘅衞生署。
點解衞生署咁關照私家醫院？又因乜事幹任由醫死人嘅庸醫照舊黑箱作業？具體原因梗係唔知啦，否則都唔叫做黑箱，之不過咁，有六個字「登」一聲彈咗出嚟：疑似官商勾結。大家唔好忘記，私家醫院嚴格而言係商業機構，而官商勾結呢家嘢，確係特區政府廣為詬病嘅長期弊端。
好嘞，家陣申訴專員公署要求衞生署改善，署方會唔會一刀劈爛黑箱，等醫療事故大白於天下？望係咁望啦，不過功夫茶最想知道嘅係，醫生呀醫生，手下留情唔醫死人得唔得？