樓冧咗，人死咗，罪魁禍首係邊個？唔好意思，未查清楚，政府官老爺話唔知邊個闖大禍。
今年一月二十九日發生震驚全城嘅土瓜灣馬頭圍道死人冧樓事件，經過差不多三個月時間，屋宇署終於發表報告。你以為報告內容會抽絲剝繭明確交代成件事嘅來龍去脈咩？唔好意思，大錯特錯，屋宇署淨係話倒塌嘅45J地下單位主要支柱中，相信其中一條支柱受到外力破壞，導致附近兩條支柱負荷超越極限而斷裂，令樓宇低層首先倒塌，向下拉力再令高層跟住冧埋。結果眾所周知嘞，有人家園盡毀，有人痛失至親，即使係鄰近街坊睇怕都會晚晚發噩夢。
既然認定係外力破壞支柱導致冧樓，點解唔去揪出黑手？屋宇署署長區載佳係咁講嘅，雖然知道係外來力量造成慘劇，但係邊個要負責任有待調查，必須經過科學鑑證以及證據蒐集，亦要徵詢律政司意見。
咦咦咦，咪住先，聽講事發當日有人做緊維修喎，所謂外力破壞會唔會同維修工人有關呀？區載佳答得模棱兩可，佢話喎，冧樓現場地下由一月二十三日起有維修及清拆僭建物工程，直至一月二十九日，之不過咁，區署長唔知冧樓當時是否仍有工程。講來講去，又係話要進一步化驗先至可以確定外力來源。
三個月查咗一大餐，最終得出一頭霧水嘅結論：一切尚待調查。功夫茶想問一問區載佳，屋宇署呢份所謂報告究竟有乜嘢意義？打個譬喻吖，警方發現一條眉心有子彈窿嘅屍體，功夫茶敢寫包單，差人叔叔唔會經過三個月調查之後發表報告話：「死者致命原因係外力破壞大腦中樞神經系統，不過外力來源唔知同邊個有關。」
唉，成件事始終不明不白，難怪其中一位死者嘅媽媽喊到傷心欲絕，講到明對呢份冇料到嘅報告好失望。講真，係人都不滿啦，邊個要負責又唔知，向邊個追討又唔知，唔嬲就假咯。經歷喪子之痛嘅可憐媽媽講得好有道理，屋企理應係最安全嘅地方，估唔到成為乖仔嘅葬身之地，希望政府盡快交代刑責誰屬，誓要為愛兒討回公道。
唔知大家點諗，功夫茶就覺得屋宇署本身亦都難辭其咎。試想想，出事嘅係一幢幾十年樓齡嘅舊樓，屋宇署唔係有責任監管舊樓安全結構嘅咩？話就話涉及外力破壞啫，真相有機會係日久失修導致「一條稻草壓死一隻駱駝」。講得卡通少少，如果一幢樓舊到五勞七傷搖搖欲墜，係咁意鑽一口釘都可能成為死人冧樓嘅外力破壞啦！
不如再打一個譬喻，假設區載佳眉心出現一個子彈窿，你估區署長會唔會滿意冇人話畀佢聽黑手係邊個吖嗱？
講到尾，冧樓雖然有外力破壞嘅黑手啫，屋宇署始終負有不可推卸嘅責任。計功夫茶話齋，如果壓死駱駝嘅真係一條稻草，之前將駱駝虐待到半死不活嘅元兇都要捉去大興問罪之師！