先講一個壞消息，希臘經濟危機造成骨牌效應，歐元匯價應聲急挫，話唔定會拖累全球！
再講一個好消息，由於經濟前景唔係幾明朗，所以估計全球用油量會大幅下滑，國際原油價格係咁起勢跌跌跌跌跌，一度跌穿每桶七十美元！
嗱，唔好話功夫茶幸災樂禍呀，事關國際油價暴跌關乎民生大事，柴米油鹽醬醋茶有機會水退船低，師奶去街市買餸都唔使呻到樹葉都落啦。
油價到底跌咗幾多呢？以最近三個禮拜計算，高位係每桶八十六美元，換言之跌幅高達兩成。照咁講，車用燃油應該大幅減價喎，唔好奢望減足兩成吖，減十零個巴仙都好。功夫茶作為一個駕駛人士，望都望油魔唔好再係咁大咬，揸車揸到燒銀紙，好鬼死肉痛o架！
咪住先，原來有人計過數，國際油價係就係暴跌兩成，之但係油公司嘅零售價格幾乎紋風不動，三個禮拜之內係咁意減價一次咁大把，減幅係少得可憐嘅不足百分之二。妖也魔！油魔果然係妖中之魔，始終死性不改咬到你出血，加快減慢面不改容。
喂，講到口水都乾啦，做生意嘅嘢唔應該咁奸茅吖嘛，油價升你就識得第一時間加價，油價跌你又慢條斯理扮一條冇厘反應嘅鹹魚，即使係奸商都冇理由奸到出汁啫，吓話！
有一個團體叫做本港油價監察聯盟，對於油公司加快減慢嘅貪得無厭非常之咁不滿，所以發咗一份聲明，提出兩項強烈要求：一，本港油公司即時調低油價至同等國際油價跌幅；二，政府加強監察角色，每星期對外公布國際油價與本港油價對照。聯盟仲話，假如油公司或者政府冇合理回應，將會發動汽車罷駛，以及停止到其中一間油公司入油。
計功夫茶話齋，啱o架喇，一於再次發起「餓死油魔」大行動，眾志成城為公益吖嘛。冇錯呀，真係攸關公共利益o架，試想想，只要車用燃油減價，交通費咪有議價空間囉，要求港鐵同巴士公司等等相應減價都可以理直氣壯。
唉，話時話，搞到民間自發餓死油魔其實相當可悲，畢竟監察油公司本來就係政府嘅責任，家陣大嘅懶懶閒閒唔去管，害到細嘅頻頻蹸蹸要自救，你話係咪可悲到極？
油魔唔餓唔死，官崽唔踢唔理，不如咁啦，兩條戰線同步進行，一條戰線餓死油魔，一條戰線腳踢政府，踢到環境局局長邱騰華諸色人等交功課。假如抗戰成功，跟手就要再踢一踢運輸及房屋局局長鄭汝樺，要求佢老人家向公共交通機構施壓，減價喇喂！
其實，公共交通機構減價對鄭局長都有好處吖，萬一下次又被困立法會然後搭港鐵落荒而逃，車費慳番少少嘛。