如果醫生當睇症係買大細，博中有得醫，博唔中就係咁先，邊個夠膽幫襯？假如患者係精神病人，咁嘅治療又點可以康復？身邊嘅人又點可能放心？
聽落好荒謬？呢啲正正係本港精神病患者社區支援嘅現狀。葵盛東邨發生斬人慘案之後，有精神病人日前投訴話，每次覆診由問症到開藥只得三分鐘，連講清楚病情嘅時間都唔夠；有精神科醫生甚至直言，每次診症都「好似買大細咁，博一博」。
唔係啩？買大細衰咗至多破財啫，精神病人得唔到及時同準確診斷，延誤治療，隨時可能搞出人命。呢，家陣全港精神病人有十五萬，住院接受治療嘅只有一成，九成分散各社區，可見社區支援幾咁重要。
醫院資源有限，床位唔夠可以理解。不過，當局近年鼓勵精神病人「融入社區」，但係相關支援長期不足，變咗將康復者踢入社區，根本係推卸責任。更離譜嘅係，政府話就話增撥資源加強精神科服務，原來又係冇米粥，大部分資源都未到位，精神科醫護人手不足，康復病人覆診排期時間長，醫生診症時間短等問題更加突出，令悲劇重演嘅風險大增。
「東方報業民意調查」顯示，葵盛東邨慘案暴露出當局對精神病康復者出院後支援不足，近四成受訪者認為，問題反映政府部門協調不足；兩成八批評當局喺監察、呈報及支援等方面存在漏洞；兩成半直斥有關部門掉以輕心，冇正視問題。
講開政府支援，真係把幾火，慘案發生後，曾蔭權同食衞局局長周一嶽居然滋滋油油過完周末至對死者家屬表示慰問，承認有需要反思協助精神病患者同康復者嘅資源及配套服務，遲唔遲啲呀！
上述調查發現，三成八受訪者批評港府一直漠視問題嚴重性；三成人斥責政府係事後孔明。由於當局闊佬懶理，類似悲劇一再發生，有一成六受訪者認為周一鑊要負上最大責任，認為煲呔曾要負責嘅亦有一成五；更有一半受訪者認為，佢哋兩個都難辭其咎。
唉，淨係精神病康復者社區支援都搞到一鑊泡，畀市民炳到七彩有乜奇呀。講真，港府對病人冇承擔又點止呢單呀，查實長期病患者一樣係咁慘。醫管局推出藥物名冊制度，好多貴價藥都要自費，唔少病人為慳錢自行減藥，甚至拒絕求醫。上述調查發現，四成五受訪者指藥物名冊制度好失敗，係要病人等死；兩成七不滿醫療政策淨係「向錢看」；認為政府官僚無情嘅亦有一成五。
計功夫茶話齋，呢個特衰政府無論對精神病康復者定係對長期病患者，既冇長遠承擔，亦冇足夠支援。醫療制度千瘡百孔，但係煲呔曾同周一鑊嚟嚟去去都係得攞啲爛膠布左貼右貼呢招，你話係咪死得人多吖。