普通打工仔薪水唔見有得加，爭取最低工資仲畀廿蚊張等人無良壓價，哈，死得佢吖，政府作為大股東嘅港鐵居然帶頭加價喎。唉，難怪有民意調查顯示，兩岸四地之中以港人治港嘅特區政府最乞鬼死人憎。
講講港鐵點樣加價先啦。港鐵宣布，六月十三日起調整票價，平均加幅百分之二點零五，八成乘客會加價一毫至兩毫，大約一成不受影響。港鐵仲話，上水至尖東全月通新售價係三百九十元，屯門至南昌全月通新售價係四百一十元，屯門至紅磡全月通新售價係四百八十元，即係全部月票加價十元。屯門至南昌全日通亦由二十元加至二十一元，加幅百分之五。
可能畀人鬧得多唔識得敬老啩，港鐵延長長者乘車優惠一年。現時長者優惠只限於星期三以及公眾假期，可以用兩元搭車，優惠會擴展至星期六。小恩小惠仲有迷你糖仔，凡於七月或八月購買月票，可獲贈二十元超級市場禮券一大張。即係咁，你肉隨砧板上，港鐵一刀斬落嚟，怕你叫得太悽慘，有機會震穿佢耳膜，所以醒你半粒止痛丸。
唉，由始至終講到尾，港鐵加價點都係唔啱o架。一來，香港經濟尚未真真正正復甦，起碼平民百姓未受惠，捱生捱死仍然係無殼蝸牛；二來，喂，港鐵賺大錢喎，十年盈利超過七百億，冇理由貪得無厭賺到盡啫；三來，講到口水乾啦，港鐵嘅大股東係政府，點都應該顧及社會責任啩！
唔講大家可能唔知，原來政府呢個港鐵大股東，過去十年收息同埋股權收入超過二百億元。所以咯喎，立法會多位議員建議，不如政府將呢一筆錢資助弱勢社群吖，用於支援跨區交通或者傷殘津貼。你估官老爺有乜反應吖嗱？反應就係，支吾以對，嗯……唔……咦……開完會咯喎，收工！
唉，冇o架喇，冇咗就係冇咗，民心呢家嘢，一旦冇咗就搵唔番。好嘞，講講點樣大失民心吖嗱。香港大學民意研究計劃日前公布最新民調結果，兩岸四地之中，香港人對於特區政府最反感，比率係百分之二十六，反感程度比半年前大升六個百分點。因乜事幹咁乞人憎呢？學者認為，政府過去半年處理高鐵諮詢、樓價飆升以及政改等問題表現差勁，令市民非常失望，所以反感程度大增。
計功夫茶話齋，六月十三日之後反感程度一定與日俱增，除非港鐵取消加價掠水大計。
咦咦咦，咪住先，港鐵賺錢方法之一係出售上蓋物業，聽講南港島線黃竹坑站又會有新樓盤大興土木，話唔定又賺二百億。
你知啦，家陣一大民怨係樓價太貴，政府又懶得幫市民置業，到時港鐵起好樓大賣特賣咯喎，好大可能將乞人憎指數推上高峰。
民心有冇辦法失而復得呢？唔係話冇嘅，曾蔭權試下腳痛囉，或者有少少用啩。