高比仔變身助攻王

「紫金兵團」藉主場威勢，昨仗有極佳開局，阿堤斯單節已貢獻10分，助湖人首節領先36比24，早早拉開優勢。但客隊未有放棄，第三節憑老將格蘭希爾連番跳投得手，一舉追成90平手，而格蘭希爾單喺第三節已攻入14分，證明寶刀未老。可惜鳳凰城末節再崩潰，開節初段已讓湖人打出一段9比0攻勢，將之前努力付諸流水，其後更有巴布沙撞穿頭離場，最終湖人贏124比112，有驚無險領先2比0。

歸功加素內線打晒

雖然高比仔今場僅得21分，連續六場「30+」得分終結，不過佢就貢獻13次助攻，刷新個人季後賽助攻次數新高，相信連鳳凰城都估唔到高比仔會喺呢場退居配角。不過高比仔賽後卻歸功於隊友加素：「當你擁有加素在內線，比賽往往變得容易。」加素今場射入29分及搶得9個籃板，而阿堤斯亦貢獻18分。

鳳凰城方面，領袖拿殊今場造出15次助攻，季後賽助攻次數突破一千大關，可惜球隊仍然輸波。第三回合將在香港時間周一早上在鳳凰城上演。

太陽中鋒羅賓盧比斯（右）同湖人前鋒加素力搶籃板。 （美聯社圖片）	鳳凰城連敗，積遜李察遜（左）同達基斯頭耷耷離場。 （美聯社圖片）	放大圖片

■本報綜合報道