官捉賊就聽得多，官幫賊真係聞所未聞。睇吓以下古仔，就知道功夫茶講緊乜。
話說康文署轄下嘅沙田源禾路體育館日前發生儲物櫃連環爆竊案，現場係冇裝閉路電視，又冇保安看守嘅一樓男更衣室，賊人如入無人之境，撬開咗十六個儲物櫃，共有四位租用者「中招」。
損失現金財物都未算慘，其中有位失主馮先生仲黑仔，佢接到體育館通知之後，發現除咗現金、身份證等唔見咗，連銀行信用卡都冇埋，打電話去信用卡中心報失至知道，賊人已經喺康文署職員通知失主之前，施施然咁喺附近店舖用佢張信用卡碌咗一萬五千蚊購物。
據馮先生講，康文署由報警到通知失主，中間足足過咗三十分鐘，喺呢「黃金半小時」內，賊人有足夠時間碌爆偷番嚟嘅信用卡，令失主損失慘重，康文署直頭係「靠害」。
又唔怪得馮先生扯火嘅，體育館任人自出自入，更衣室居然「零設防」，變咗無掩雞籠，康文署管理不善已經難辭其咎；而出咗事居然仲滋油淡定，延誤半粒鐘至通知失主，等不法之徒可以優哉游哉碌卡Shopping，令失主蒙受雙重損失，更加係罪無可恕。康文署咁搞法，同做幫兇又有乜嘢分別？
更離譜嘅係，康文署唔認衰，仲話當時已喺十分鐘內通知租用者，又話已訓示員工加強巡邏。唔使死撐喇，康文署管理水平係點，市民心中有數。呢次失竊主因係現場冇裝閉路電視，又冇保安，查實，就算裝咗攝錄機又有人實，以康文署管理咁混亂，照樣爆大鑊。
嗱，早排康文署轄下斧山道游泳池有十三歲女中學生喺嬉水池不幸溺斃，事件懷疑因為署方管理不善，救生員人手嚴重不足而引起。事後有泳客踢爆，話曾經喺事發泳池見到有救生員當值期間狂煲手機超過十分鐘，罔顧泳客安全，向主管投訴，對方居然話，閉路電視拍攝唔到「罪證」；再向康文署投訴，又係冇晒下文。
如果話康文署閉路電視有「眼」等於冇，似乎有欠公允。前排該署內部有人踢爆，話公眾泳池除咗更衣室外，周圍平均裝咗幾十個閉路電視，但啲鏡頭似乎攞嚟泳客私隱多過照顧泳客安全。有主管被投訴喺冇需要同冇事故情況下濫用閉路電視，侵犯泳客私隱；有人甚至將影像燒錄成光碟，留番嚟慢慢「欣賞」。
儲物櫃失竊，康文署睇唔到，但泳客嘅私隱就到實，呢啲係咪叫做選擇性發雞盲呢？咪話功夫茶唔提醒，泳季已到，暑假亦嚟緊，唔該康文署班高官盡快醫好「眼症」，睇清問題，改善管理，堵塞漏洞，咪再攞市民性命同財產嚟較飛！