講到數口精，食環署署長卓永興認第二，睇怕冇人夠膽認第一。弊在佢至精嘅唔係幫納稅人慳錢，而係專搵街市檔戶笨，簡單嚟講，即係以其之精，搵人之笨。
不過咁，你精，人哋都唔笨。下禮拜一可能出現二千檔戶圍堵立法會及禮賓府嘅壯觀場面，禮拜四仲可能有幾十位長者檔戶上演「千歲絕食」好戲添。點解咁大鑊？咪就係畀食環署逼上梁山咯。
話說食環署轄下街市空置率年年飆升，搞到年年蝕大本，畀審計署一炳再炳，當局冇心改善，淨係識掠水一招，除咗聲稱要收番市值租金之外，更打算喺新租約列明差餉同冷氣費要檔戶自己搞掂。卓永興仲話，每年用公帑補貼街市營運係「政府出雞、檔戶出豉油」。
唔係啩？食環署街市管理差、設備差、配套差、空氣差，行入去分分鐘焗到暈，呢啲街市橫睇掂睇都冇肥雞Look，學檔戶話齋，似發瘟雞多啲，點食得落呀？
長期用公帑補貼街市等於幫納稅人倒米，食環署適當調整租金，冇人話唔啱，問題係當局唔先諗辦法活化街市，改善管理，又冇更新設備同增加配套去吸引人流，一聲令下就話要加租加差餉，甚至話六年內要收回市值八成租金，有租戶第一年就要面對瘋狂加租十二倍，咁又點講得通呀。食環署諗住無本生暴利，佢出「發瘟雞」，檔戶要倒貼「頂級頭抽」，咁畀人搵笨，你話檔戶唔上街抗議至奇喇。
講開又講，同樣係瘋狂加租，領匯就比食環署識做好多，最起碼都先裝修吓啲商場或者街市，執到企企理理，仲周不時請班人嚟唱吓歌、跳吓舞、做吓騷，帶旺個場，吸引多啲人嚟幫襯，然後至提高租金。
雖然都係掠水，但領匯起碼做咗工夫，都叫做出師有名吖。食環署連表面工夫都慳番，翹埋雙手乜都唔做，關人個關，甚至連先活化街市都唔肯應承，淨係識得加租加租再加租，檔戶有乜理由唔氣頂呀？
食環署轄下有約一萬五千個街市攤檔，整體空置率超過兩成，即係話有三千幾個檔位冇人吼。查實絕大部分街市位處市區，出入好方便，如果管理得好，人流本來唔係問題，可惜交到食環署手上，就搞到門前冷落，人流稀疏，檔主冇晒心機。做生意要靠人氣，人頭湧湧自然貨如輪轉唔憂做，相反，日日拍烏蠅，就算唔使租都冇人吼啦。
計功夫茶話齋，食環署未活化先加租，呢招簡直就係殺雞取卵，本末倒置，愚不可及。如果檔戶不堪重租，一個個拒絕再玩，街市蝕得仲多，死得仲快，到時睇怕唔使勞煩食環署班懶官出手，所有公共街市都自動活化成超級老鼠竇咯！