塵世間最悲哀嘅慘劇，莫過於母親節痛失好媽媽。唉，葵盛東邨一場慘無人道大屠殺，除咗鮮血四濺兩死三傷之外，更加揭發香港依然存在不少窮人悲歌，功夫茶想問一問曾蔭權政府，貧富懸殊世界冠軍呢家嘢，各位達官貴人仲想掩耳盜鈴到何年何月呀？
大屠殺其中一位死者叫做劉潤蓮，丈夫八十高齡行動不便，仍然日日去港鐵站執拾舊報紙變賣幫補家計。至於劉女士自己，任職卑微嘅酒樓洗碗工。如果係其他窮苦大眾，可能早早已經申領綜援，之但係劉女士有骨氣，寧願自力更生都唔依靠政府。最終無辜辜飛來橫禍，難怪有人哭訴：點解好人死得咁冤枉！
冇錯，劉女士的而且確係好人。據街坊透露，佢對同住五樓孤苦無依嘅鄰居婆婆照顧有加，每日噓寒問暖送湯水，直至婆婆百年歸老。好人死得冤枉，梗係令人唏噓啦！
劉潤蓮有一位好姊妹譚益順，分屬同聲同氣東莞同鄉，一樣係今次慘劇嘅受害者。譚女士本來都係酒樓洗碗工，酒樓結業之後惟有做一啲手作仔工夫，即係幫成衣穿牌仔，賺取少得可憐嘅微薄收入。講到呢度功夫茶開始眼濕濕，大家知唔知兩位慳家好媽媽點解會遇襲？佢哋為咗慳電，唔想留喺屋企開燈，所以走咗去後樓梯開工穿牌仔，點知咁就撞到正，兇徒斬死劉女士，順嫂身受重傷！
另一個死者係三十五歲嘅管業主任郭放基，原本打算同女朋友今年結婚㗎喇，一把刀害到人哋家散人亡，未婚妻愁對紅事變白事。
好嘞，震驚全城嘅血腥兇案點解會發生嘅呢？具體動機當然唔可以靠估啦，之不過咁，疑兇原來係葵涌醫院註冊病人，係一個精神病患者，曾於二○○四年入院。咁都唔止，疑兇有暴力前科，十年前因為斬傷妻子而入獄，兩年前又毀壞屋邨公物被捕，街坊亦試過險遭怒劈。換句說話嚟講，疑兇一早就有斬人暴力前科啦。
呢嗱嗱嗱，類似血案唔係第一單㗎喇，舊年亦有精神病患者當街斬死小朋友，再之前就有精神病患者掟仔女落街，其他例子十隻手指數唔晒。好嘞，問多次，震驚全城嘅血腥兇案點解會發生嘅呢？答案係醫管局精神有問題，思緒紊亂之下任得疑兇通街走，結果害到無辜好人冤枉死！
精神病患者獨居公屋，名義上叫做「融入社區」，原意本來係冇錯嘅。可惜吖，醫管局冇跟進照顧吖嘛，明知有暴力傾向都冇諗辦法防患於未然，咁咪出事囉。
今年母親節特別淒酸，路有斬死骨，醫門酒肉臭，醫管局高層一個二個年薪幾百萬，竟然冇人想方設法增撥資源治療精神病患者。公立醫院精神科病床嚴重短缺吖嘛，咁就造成社會危機嘞。
喂喂喂，曾爵士，窮人冇飯開已經夠慘，穿牌仔過活已經夠殘，留番少少尊嚴畀佢哋，唔使死於狂刀得唔得呀？假如閣下有病，睇醫生啦唔該！