生活靜靜似是湖水，全為你泛起生氣，全為你泛起了漣漪，歡笑全為你起！
唔好以為功夫茶歌神上身或者黐咗孖筋，忽然諗起陳百強名曲《漣漪》係有道理嘅，事關最近有一位尊貴議員真係令到靜靜生活泛起漣漪，為全城帶來無窮歡笑。邊個議員咁巴閉？之唔係自由黨飲食界議員張宇人囉，呢位哥哥仔一次又一次語出驚人，就最低工資立法問題激發民間生氣。當然啦，生氣兩個字好得意㗎，可以解作生氣勃勃，亦都可以解作扯火生氣。
歡笑嘅笑位有三個。第一個笑位，張宇人由於提出刻薄嘅「時薪二十元論」，所以得到花名「張廿蚊」；第二個笑位，由於廿蚊時薪過分無良，「張廿蚊」先道歉後改口，花名變咗「張廿四蚊」；第三個笑位，「張廿四蚊」好大機會再有一個新花名，叫做「張漣漪」。
點解叫做「張漣漪」嘅呢？哦，係咁嘅，張宇人話喎，如果時薪訂得太高就會產生「漣漪效應」，最低工資上面嘅次低工資勢必一系列水漲船高，到時就搞到經營成本難以負荷，食肆執笠都有之。
這邊廂，張宇人代表大財團出盡奶力壓價，那邊廂，基層市民以及勞工團體上街示威。淨係尋日之嘛，已經分別有兩批人士遊行，一批爭取最低工資不少於三十三蚊，另一批要求不少於三十五蚊。如無意外，類似示威遊行陸續有來，唯一肯定嘅係張宇人唔會率領有錢佬上街爭取「時薪不高於廿四蚊」。
講到呢度，大家可能會問，功夫茶到底想點？究竟贊成時薪高少少，定係低少少？唉，功夫茶不得不懺悔告解，的而且確唔知想點，原因好簡單，手頭無數據。
喂喂喂，家陣爭來拗去有乜嘢意義先？空口講白話係冇用嘅，最低工資立法最緊要睇數據吖嘛，即係勞動人口有幾多需要得到最低工資保障，營商環境會受到乜嘢影響，「漣漪效應」到底係齋噏靠嚇定係真有其事，諸如此類都要數據支持，否則缺乏討論基礎。功夫茶自問冇本事搵到相關數據，所以無法肯定時薪應該係幾多蚊。
既然係咁，邊個先至有本事提供數據呢？唔使問啦，梗係神通廣大嘅特區政府。可惜吖，勞工及福利局局長張建宗話喎，對於最低工資問題，政府完全持開放態度，並無既定立場。
態度開放表面上廣納眾議，實際上徒惹煩亂。大佬，你淨係拋出一個最低工資議題，乜鬼數據都唔提供，然後要大家討論，即係叫勞資雙方玩泥漿摔角啫，一個開天索價，一個落地還錢，拗來拗去拗到鬼哭神號日月無光。即係咁，任何講價行為一旦缺乏有根有據嘅討論基礎，最終一定演變成亂噴口水嘅罵戰。
張建宗話喎，臨時最低工資委員會現時正聽取不同意見，未來會好詳細、客觀、審慎咁分析數據，分析之後會以數據為依歸向政府提交建議。計功夫茶話齋，呢家嘢叫做縮骨老倌執死雞，等你哋耍盲拳打餐飽先囉，跟手官老爺先至以數據為依歸「主持公道」。所以話啫，深層次矛盾好多時候係由政府一手造成。