常識問答時間，問題一：手掌比較敏感吖，定係手肘比較敏感？問題二：成年人比較嫩滑吖，定係ＢＢ仔比較嫩滑？
關於第一條問題，答案當然係手肘比手掌敏感，因為手掌皮膚厚少少，武林中人甚至可以練成神奇耐熱鐵砂掌。至於第二條問題咯喎，傻嘅都知ＢＢ仔比成年人嫩滑得多，否則護膚品廣告唔會宣稱「用咗好似小寶寶咁滑」。
好嘞，瑪嘉烈醫院終於就滾水淥嬰事件發表調查報告，講出一個令人難以置信嘅荒謬情節，負責為三個月大男嬰希希洗白白嘅護士，竟然唔係按照既定程序以手肘試水溫，而係用手掌！
醫管局調查委員會主席李志光指出，事件屬於人為錯誤，手肘同手掌嘅敏感度不同，嬰兒浸於四十五度熱水一百二十五秒已經可以造成二級燙傷，成年人要浸一百分鐘先至出事。李志光又話，用手掌放入四十五度熱水，一般成年人可以忍受，唔會即刻縮手，但係用手肘就會感到灼痛。更加匪夷所思嘅係，原來涉案護士一直以來都係用手掌測試水溫。功夫茶有少少懷疑，滾水淥嬰嘅受害者唔止希希一個。
呢單畸屎最得人驚嘅地方就係，話就話涉案護士係○八年先至畢業嘅新丁，資歷尚淺冇乜實戰經驗，甚至可能練過鐵砂掌，所以水溫熱一熱都唔知，之但係，點解一直以來從無上司或者同事糾正佢嘅測試水溫方法？既定程序明文規定手肘測試，梗係有道理㗎啦，家陣有個護士唔知係太傻瓜定係貪方便，居然改用手掌，院方毫不察覺又全無糾正，好鬼死牙煙啫，容乜易其他既定程序都可以一一忽略㗎！
計功夫茶話齋，成件事固然係人為錯誤，不過犯錯嘅唔止一個，瑪嘉烈醫院所有相關人等都有錯。打個譬喻吖，有個機師冇按既定路線飛去東京，而係擺烏龍飛咗去南京，冇出聲糾正嘅副機師有冇責任吖？冇要求機師浪子回頭嘅航空公司有冇責任吖？甚至乎機場控制塔都有責任，應該利用通訊系統當頭棒喝：呢度係南京，唔係東京呀，懵丙！
聽完調查報告之後，希希嘅爸爸係咁講嘅，報告只係聽取護士單方面證供，尚有諸多疑點仍未解答，不排除待院方向護士展開紀律程序之後有進一步索償行動。
計功夫茶話齋，最大嘅疑點就係院方將責任推晒畀一個護士。喂，點解報告只係聽取護士單方面證供？好明顯，因為當時冇主管從旁審核吖嘛，即係毫無監管囉，連閉路電視都冇，任得一個經驗不足嘅新丁誤打誤撞，卒之撞正大板。
所以話啫，與其話應該處罰涉案護士，不如話醫院主管都有責難逃，必須一齊受罰。點罰好呢？最公平嘅當然係捉晒去滾水淥豬腸啦，淥到甩皮嗰隻，不過似乎又殘忍得滯。不如咁啦，交畀食衞局局長周一嶽，一邊浸住四十五度熱水，一邊諗諗有乜懲罰方法，但係記住喎，成年人浸一百分鐘就會二級燙傷，千祈唔好轉數太慢呀！