吓吓吓？講乜話？水務署醞釀改變水費計算方法，變相加價？呢鋪撞鬼咯，功夫茶反建議水務署署長馬利德返屋企一盆冷水照頭淋，為自己燒壞腦嘅發熱系統降降溫。
之所以會有變相加水費嘅陰謀，表面理由係咁嘅，水務署話喎，鼓勵市民節約用水。署方仲話，香港人平均用水量偏高，每人每日用一百三十公升水，以及九十公升沖廁水，而香港水費係已發展地區最低，只佔家庭開支約百分之零點二，相當於歐美國家三分一至二分一，所以有需要檢討水費。檢討水費嘅意思大概係，現有四層收費結構加一層，用水愈多收費愈勁。
呢嗱，就咁，鼓勵市民節約用水係絕對環保正確嘅，功夫茶舉腳支持，畢竟水資源真係好矜貴，香港身在福中不知福，內地西南地區仍然飽受旱災之苦，冇理由繼續洗腳唔抹腳。之不過問題係，喂，邊個係浪費食水超級大戶呀？如果水務署其身不正，不斷浪費矜貴到極嘅水資源，咁又有乜資格利用加水費鼓勵節約用水呀？即係咁，敗家仔冇資格叫人慳家！
如果大家認為功夫茶講得太激，咁就不妨睇睇以下嘅敗家數據——
首先，香港水管殘殘舊舊日漏夜漏，每年漏水量超過兩成，合計二億立方米，涉及金額七億。難得水務署仲好意思厚顏認叻，佢哋話喎，家陣滲漏比率下降咗o架喇，情況大有改善。到底有乜改善？唔好意思，滲漏比率依然係兩成一，改善情況只可以話係好過冇。
其次，水務署自己浪費不特止，仲要強迫市民一齊陪佢嘥水。香港並唔係所有地區都鋪設鹹水沖廁系統o架，好似港島南區、屯門、元朗、西貢同埋離島，竟然要用食水沖廁，受影響人數多達一百三十萬，每年有八千二百萬立方米食水沖落鹹水海。你話嘞，假如你係熱愛地球嘅環保人士，但係迫於無奈日日睇住屋企個馬桶不斷沖呀沖、沖呀沖，沖走大量可以用嚟煮飯嘅食水，你係咪會覺得水務署係你嘅殺父仇人？
仲有，香港有一個奇景，就係日日夜夜爆水管，東邊爆完西邊爆，大街爆完小巷爆。爆水管究竟浪費幾多食水？冇人知o架，視乎水務署補鑊效率，補得快咪好啲囉，補得慢咯喎，一來浪費到極，二來交通擠塞，經濟損失難以估計。水務署又扮晒叉燒認叻，佢哋話喎，爆水管次數少咗好多o架喇。問題係，少極都依然係一年一千宗，平均每日爆三鑊，你話嘞，水務署係咪徹頭徹尾敗家仔？
冇錯，香港市民毫無疑問必須節約用水，不過水務署完全冇理由利用加水費達成目的。試問，香港市民要節約到乜嘢程度先至補得番水務署每年浪費嘅七億公帑呀？唔通你叫人唔好沖涼咩！
一言以蔽之，敗家仔冇資格叫人慳家，水務署冇理由醞釀加價，馬利德署長假如真係燒壞腦，一盆冷水照頭淋可能都未夠，索性搵個水塘跳落去浸七日洗滌心靈啦！