請恕功夫茶孤陋寡聞，以前真係未聽過「垃圾評級」呢家嘢。自從希臘出現財政危機之後，全世界都實呢個國家會唔會破產。哈，唔知係咪落井下石，標準普爾將希臘主權信用評級下降為垃圾水平，嚇到金融才俊手騰腳震。
因乜事幹提起垃圾評級？哦，冇嘅，先天下之憂而憂吖嘛，假如有一日香港都得到垃圾評級，咁就家門不幸咯。唔好以為杞人憂天，特區政府嘅表現有時確係幾垃圾o架，譬如話，監管中成藥廠肯定係差到無倫。
自從百年老字號保濟丸出事之後，中成藥嘅監管問題備受關注，更加揭發香港好多藥廠竟然以山寨模式經營，製藥製到好似獅子山下穿膠花咁兒戲，求求其其喺自己屋企搭條微型生產線就話係藥廠。卒之，衞生署屈服於輿論壓力真係去巡查嘞，你估查到乜呢？死得佢吖，衞生署巡查過五百間中成藥廠，其中三百五十間取得過渡性註冊牌照已經七年嘅藥廠，全部未達到正式註冊嘅要求！
所謂過渡性註冊，打個譬喻嚟講，就好比學生哥讀預科，預備升讀大學，亦即係取得正式註冊咁解。好嘞，家陣有三百五十個「預科生」，呆頭呆腦讀咗七年，居然冇一個夠資格升做「大學生」，你話係幾咁羞家嘅一件事。
三百五十個事隔七年仍然讀書唔成嘅「低材生」到底衰啲乜？衞生署話喎，七十間藥廠已經停業，三十間環境不理想，例如廠房設於住宅大廈，其餘二百五十間喺防止污染、製藥技術以及人手管理等等方面有待改善或者文件未齊。
既然中成藥廠冇資格升級，正路應該叫佢哋執笠，唔好畀劣質藥物流入市面吖嘛。點不知，衞生署原來係一個寬宏大量嘅慈母，佢哋話喎，畀多兩年時間改善，如果仍然達唔到要求，先至會被淘汰。唉，慈母多敗兒咪就係咁解囉！
即係咁，成件事反映衞生署七年以來不聞不問，完全冇鞭策中成藥廠自我增值，結果搞到烏厘單刀。再打一個譬喻，假如有預科生讀咗七年書都升唔到大學，負責教書嘅老師係咪應該炒魷魚吖？家陣講緊嘅係三百五十個同學仔集體唔合格喎，誤人子弟嘅人之患簡直有必要撼頭埋牆以謝天下。
所以話啫，衞生署監管中成藥廠嘅表現真係疑似垃圾o架。
咦咦咦，咪住先，曾蔭權失驚無神走咗去南京考察，又失驚無神講咗一番偉論，佢話香港正致力發展醫療同檢測認證產業，並已成立檢測和認證局，相信與內地製藥業有好多合作空間。
與內地製藥業合作？咪玩啦，冇咁大個頭唔好戴咁大頂帽，除非煲呔曾講嘅係山寨製藥業。至於講到檢測認證，如果衞生署有份檢測藥物孰優孰劣，咁就嚇到功夫茶手騰腳震嘞。你知啦，保濟丸嗰單嘢全靠新加坡檢測發現㗎咋，香港官老爺矇查查後知後覺。靠衞生署檢測藥物喎，同一個跑唔郁嘅大肥佬去做球證冇乜分別。
不如咁，衞生署抖擻精神做番一齣好戲，然後學似風之后李麗珊振臂一呼：香港衞生署唔係垃圾！