成日都話申訴專員公署係全港最忙碌嘅政府部門，事關香港冇嘢多，最多就係練精學懶嘅公務員，公署想捉幾多就有幾多。呢嗱嗱嗱，真係冇講錯㗎，事實勝於雄辯，申訴專員又做嘢嘞，今次發炮狂轟嘅對象係運輸署。
運輸署又衰乜呢？即係咁，申訴專員批評運輸署卸責，對於一個私人屋苑地下嘅公共運輸交匯處放任不管，單車違例停泊問題持續超過兩年冇改善，屋苑業主委員會多次向多個部門包括運輸署以及民政事務總署投訴，一直冇人負起責任。申訴專員批評部門之間互相卸責，令市民覺得政府冇承擔，影響管治。
「影響管治」呢四粒字擲地有聲，絕對係可圈可點。唔好以為改善單車違例停泊問題係雞毛蒜皮小事，正所謂，修身、齊家、治國、平天下，如果一個人連修身都唔識，即係自己未搞得掂自己，試問又點樣去治國平天下？特區政府假如管單車都管到一塌糊塗，小市民又點樣靠佢安居樂業？福為民開喎，一味靠老點咩！
千祈唔好以為申訴專員小題大做，見微知著吖嘛，單車違泊管唔掂，其實係直接反映香港嘅官僚水平有幾低。
如果大家唔善忘，應該記得幾年前有一單經典案例。將軍澳有人通街晾衫晾褲晾棉胎，晾到鬼五馬六有礙觀瞻，政府各大部門你推我讓冇人理，卒之辣申訴專員，一嘢踩上政務司，要求當時嘅司長曾蔭權親自處理。可能煲呔曾做過「全港清潔大隊長」經驗豐富啩，所以二話不說即刻乖乖地走去收拾殘局。
堂堂政務司司長走去管晾衫，係咪好荒謬呀？冇錯，正正就係荒謬，所以證明官僚主義懶骨頭係幾咁「影響管治」，下面做細嘅一個二個蛇王唔做嘢吖嘛，上面咪要勞煩年薪幾百萬嘅大老爺移動尊貴盛臀執頭執尾囉。
等功夫茶講多個荒謬古仔畀大家聽。曾經有人投訴馬鞍山西沙路泥涌一帶有好多紙鷂屍骸，政府部門照例貫徹多老母等於冇老母精神，梗係冇人願意負責啦。最搞笑嘅係，其中一個部門話喎，地面嘅紙鷂或者可以處理，之不過咁，好多紙鷂掛喺樹上，屬於天空管轄範圍，或者應該搵民航處諗諗辦法。依照咁嘅邏輯，負責監管高空擲物嘅部門肯定係民航處而唔係警務處。
好嘞，講番單車違泊問題，申訴專員點晒名要求運輸署負責改善，係咪真係可以改善呢？運輸署話喎，接受申訴專員意見，正與相關部門討論落實處理單車違例停泊嘅指引，並且制訂清理嘅優先次序，物色更多單車泊位。計功夫茶話齋，大家唔好咁樂觀，公務員最擅長就係耍官腔，對住專員梗係唯唯諾諾拍晒心口話包搞掂啦，轉個頭乜都唔記得咯。
不如咁嘞，既然以前嘅曾司長處理過晾衫，家陣嘅司長唐英年又做過「全港管樹大隊長」，索性組成「跨部門全港單車管理委員會」，由唐司長親自率領文武百官腦震盪，然後再一次疊床架屋成立「單車管理辦事處」，咁咪得囉，傻仔！