呢個世界，永遠都係同人唔同命，有人一職難求，望天打卦，有人搵工跳槽，隨心所欲，尤其係港府高官，保證永無後顧之憂。
前旅遊事務專員方舜文舊年十二月辭職，本來呢，高官拒搭沉船，離開政府一啲都唔出奇，不過當時盛傳佢會轉投貿發局做副總裁，咁就唔同講法咯。事關方舜文任職嘅旅遊事務署隸屬商務及經濟發展局，佢離開政府後轉職貿發局，唔止影響公眾觀感，更可能涉及角色衝突，有瓜田李下嘅嫌疑。
空穴來風果然有因。呢位被視為曾蔭權愛將嘅前高官，離開政府短短四個月，再就業禁制期同冷河期未滿，四月十九日就靜靜雞到貿發局返工。咁都得？梁展文事件引起市民譁然，搞到滿城風雨，立法會仲聆訊緊呢單畸士，咁快又一單？記得梁展文事件被踢爆後，當局為平息民怨，對高官離職後再就業機制煞有介事檢討一番，點知事過境遷，當局咁快又重蹈覆轍，明知有角色衝突都批准方舜文過檔貿發局，唔通繼續官官相衞就係當局嘅「檢討結果」？
最搞笑就係，公務員事務局仲為呢位前高官過檔貿發局度身訂造咗多項「工作限制」，包括任職貿發局十二個月內唔能夠直接或間接參與有關灣仔會展擴建工程、檢討和釐定貿發局資助金等等。
點解要訂造呢啲限制？事關近排私營會展業界不斷質疑貿發局壟斷香港會展業，如果當局喺風頭火勢下准許方舜文無條件轉職，一定惹起更大嘅質疑。既要官官相衞，又唔想引起爭議，咪係咁意整幾項「限制」出嚟敷衍吓輿論囉。如果當局唔係心裏有鬼，點會出現呢齣此地無銀三百両嘅鬧劇呀？正如有學者批評，有關限制只不過係遮遮掩掩，根本難以執行。講真，方舜文喺所謂「限制期」內有冇接觸同參與有關工作，公眾根本無從監管，你話當局係咪自欺欺人呀？
唔講唔知，仲有更離譜㗎。原來對於嗰啲退休以外原因離職嘅首長級公務員，當局並無訂明最短嘅禁制期，只係按個別情況考慮，即係話港府隨時都可以「放生」高官出去搵真銀。方舜文係咁，房屋署副署長李達志離職三個月就轉職金管局又係咁。方舜文過檔貿發局，年薪最高可達三百五十萬，李達志亦係名利雙收，年薪同樣有三百幾萬，簡直係三級跳，咁仲唔係官官相衞？高官過冷河機制形同虛設，唔怪得咁多政務官爭住劈炮，個個走得快好世界啦。
唉，好似貿發局、金管局呢啲公營機構，早已淪為「退休高官俱樂部」，人工高、福利好，呢班前高官玩完權力搵真銀，真係樂也融融。
功夫茶諗極都唔明，當局口口聲聲高薪養廉，納稅人以高薪厚祿供養呢班高官幾十年，佢哋離職後仲要絞盡腦汁搵真銀，莫非真係人心不足蛇吞象？係嘞，義務工作發展局數字顯示，舊年全港義工服務總時數以經濟價值計算，相當於五十五億港元，可見義工對社會貢獻良多。話時話，納稅人待高官不薄，好心佢哋唔好見錢開眼，如果退休後無所事事，係咪可以考慮做義工回饋社會呢？你睇黃福榮幾受人尊敬，當然，功夫茶唔係咒高官，只係想提醒高官發財必須立品啫！