光天化日飛來橫禍，寧靜屋邨刀光血影。葵盛東邨尋日發生斬人血案，場面恐怖，慘不忍睹。
一名有精神病紀錄嘅中年男子，懷疑幻聽有噪音致情緒失控，突然開門爆粗鬧人，跟住揮舞成呎長嘅軍刀見人就劈，前後只有十五分鐘，共有五人中招，兩死三傷。事件令人震驚，亦令人迷惑，點解類似慘劇會一而再、再而三發生？
警方話，冇證據顯示疑兇同受害人有過節。有目擊者話，疑兇事發時並冇同受害人發生爭執，斬完人之後仲喺門外歎番支「事後煙」，被拘捕時亦冇反抗。有人被制服時仲大嗌：「唔發火當我死嘅你班友！我預咗呢一世都唔出嚟㗎喇！」
葵涌醫院事後證實，四十二歲疑兇係該院嘅精神科病人，○四年曾入院治療。而警方就話，疑兇五年前由另一屋邨調遷到葵盛東邨，兩年前曾經因為喺邨內毀壞物件被捕。今次事件難免令人諗起一年前另一宗震驚全城嘅同類血案。
舊年五月，三歲男童「晉仔」喺深水埗畀一名精神病患者用刀狂斬，頭中六刀慘死，兇徒向法庭承認誤殺罪，被判入精神病院接受無限期治療。遇害男童爸爸曾寫信控訴曾蔭權同主管公共醫療嘅食衞局局長周一嶽，指當局冇關注及投放資源跟進重投社區嘅精神病患者個案，係「殺人幫兇」！
點知受害男童家人哭訴言猶在耳，慘劇又再重演。勞工及福利局局長張建宗尋日承認，葵盛東邨血案疑兇並唔係社署跟進嘅個案。咁就奇喇，點解當局一定要等到慘案發生後先至跟進呢？晉仔遇害已經一年，各界要求關注有關問題，改善社區安全呼聲不斷，當局竟然冇吸取血嘅教訓，繼續翹埋雙手關人個關，繼續做「殺人幫兇」！
其實，疑兇二○○○年曾因誤會太太紅杏出牆，將對方斬至毀容，法官考慮到佢有精神病而作出輕判。過去十年，疑兇被指喺葵青三個屋邨多次鬧事，曾涉及多宗刑毀及傷人案，街坊多次投訴都冇結果。
有葵盛東邨街坊話，疑兇喺單位大閘裝咗閉路電視鏡頭，用嚟監視其他住客，對小朋友嘅嘈吵聲亦顯得好唔耐煩，唔排除呢次係有人因為幻聽噪音，導致情緒失控而行兇。
最離譜嘅係，社署對一個曾有暴力紀錄嘅精神病患者居然完全「零跟進」。查實疑兇上個月底至去葵涌醫院覆診過，點知十幾日後就出事。家陣搞出人命，當局有乜解釋？
唉，講到尾，問題完全係因為港府縮骨，對重投社區嘅精神病患者支援嚴重不足。人哋先進國家精神科服務資源一般按人口比例計算，本港完全唔係嗰回事。關注不足，跟進不力，患者因為無定時服藥或者冇人傾訴，再次病發嘅情況相當普遍。
計功夫茶話齋，當局要精神病患者重投社區，但又不聞不問，亦冇提供足夠嘅支援，咁同靠害市民又有乜分別？試問，仲要幾多無辜市民死於非命，當局至肯正視問題，至肯郁手拆彈？