香港毒禍為患，中學淪陷，小學失守，司機「藥駕」，後生索Ｋ乜都有。鬼咩，港府禁毒既冇全面規劃，目標又唔清晰，平時執法冇力，淨係識做騷，唔怪得愈抗毒愈多毒，成日搞出人命啦。
呢，又出事嘞。元朗同將軍澳兩個只有二十幾歲嘅後生仔，尋日凌晨懷疑索Ｋ之後神志不清，產生幻覺，先後墮樓身亡。類似悲劇近排並唔罕見，青衣長康邨舊年十二月中就發生過一單。
比Ｋ仔催命更加可怕嘅，係司機索Ｋ後揸車，喺馬路上舞龍咁舞，十足「無定向導彈」咁，隨時車毀人亡，殃及途人。警方數字顯示，前年本港涉及濫藥後駕駛嘅個案只有三宗，舊年數字係七宗，但今年頭兩個月已經發現八宗懷疑「藥駕」，問題嘅嚴重性，由此可見一斑。
毒禍氾濫，市民心急如焚，但港府卻束手無策，乜都做唔到。好似「藥駕」咁，明知呢個係道路安全嘅極大威脅，但現行法例規定，除非司機自己承認吸毒，而警方亦證實車內藏有毒品，咁至可以要求對方驗毒。
法例過晒時，執法部門變咗無牙老虎，當局居然無動於衷，直到「藥駕」個案飆升，悲劇不斷發生，當局至肯做嘢。保安局副局長黎棟國尋日話，年中會就賦予警方抽驗懷疑吸毒司機嘅權力諮詢公眾喎。唉，年中至諮詢，遲唔遲啲吖？
有人話，呢個政府係後知後覺，其實後知後覺都還好，最弊係佢哋經常唔知唔覺。嗱，好似搞到好大陣仗，但劣評如潮嘅大埔校園驗毒計劃咁，既未搞清楚問題根源喺邊，又冇進行足夠諮詢就匆匆推出，結果搞到唔湯唔水，直至計劃結束，居然連一個陽性個案都確定唔到。
最搞笑嘅就係，保安局委託機構搞嘅學生濫藥調查發現，幾乎每間受訪中學都有學生吸毒；近九成受訪小學有高小生曾經吸毒，計起上嚟全港約有三萬學生吸過毒。連禁毒常務委員會主席石丹理都承認，校園驗毒計劃起唔到識別吸毒學生同阻嚇嘅作用，對擴大至全港有保留。
連自己友都大潑冷水，梗係啦，驗毒計劃不過係做騷咁做，有成效至奇。講到尾，驗毒計劃目的只有一個，就係敷衍市民，製造全力抗毒嘅假象，結果穿晒煲，自欺欺人變咗自摑嘴巴。
一句講晒，當局如果唔加大執法力度堵截毒源，唔加強禁毒宣傳提高市民警覺，唔動用重典對付以身試法嘅人，毒禍只會愈來愈嚴重。港府推出嘅校園驗毒計劃，根本係多此一舉，攞納稅人嘅錢為政績騷埋單。
新財政預算案建議向禁毒基金注入三十億，鼓勵更多機構推行禁毒計劃。咪話功夫茶唔提醒港府，如果只顧做騷唔做實事，呢筆公帑注定又係揼落鹹水海㗎咋！