咁着數嘅工去邊度搵？如果你條命生得正，有幸加入食環署葵青區防治蟲鼠組嘅，真係恭喜晒，你做緊嘅係一份好多打工仔恨都恨唔到嘅超級筍工。

呢份工有幾筍？嗱，每周只做五日，每日工作時間話就話朝七晚五，查實十粒鐘入面，有啲員工乜正經事都冇做過，即係全日零工作，最有「責任心」嘅，亦至多開工半粒鐘咁大把。

嘩，成日流流長，無所事事好悶啫！咁又唔係噃，呢班員工大把私人嘢做，睇吓報紙又得，晾吓衫又得，食吓生果亦得。再唔係嘅，趁天氣唔錯，喺寮屋「蛇竇」外面曬吓菜乾都得。用公帑租嚟接送員工外勤同運載工具嘅輕型貨車，一樣可以當私人座駕用，喺外面食完晏橫掂得閒，索性車埋啲 行李返屋企，跟住連工都唔使返。

由納稅人供養嘅公僕，返工時間唔係服務市民，而係服務自己，咁仲成世界嘅！其實，港府○六年中開始實施五天工作周，返少一日工已經偷笑喇，依家仲奉旨偷懶，咪即係名正言順歎雙重假期，明搵納稅人笨。正如有立法會議員話齋，公僕蛇王「此風不可長」，一旦發現，要嚴厲處分。

公僕蛇王被踢爆，食環署例牌又係耍幾句官腔，聲稱正就事件跟進調查，如果證實員工違規，會採取適當嘅紀律處分喎。嘥氣啦，類似嘅回應已經做過Ｎ次咁多，問題幾時改善過？唉，除咗捉蟲滅鼠嘅公事唔做之外，乜嘢私事都做，食環署蛇王愈來愈多，香港鼠患又有乜辦法唔愈來愈嚴重吖。

齋噏無謂，數字最能夠講明問題。食環署防治蟲鼠組加埋外判人員超過一千七百人，咁大棚人，一人捉一隻，斷估一年都捉到一千幾百隻老鼠嘞啩？講都冇人信，原來連個零頭都冇，成個防治蟲鼠組一年至捉到幾十隻老鼠咁大把，你話係咪笑話吖？

前線人員偷懶蛇王不在講，做嘢同樣係求求其其，得過且過。好似放置鼠餌咁，唔少市民投訴，話見到食環署人員係咁意將啲鼠餌放喺坑渠就算，有啲甚至掛喺牆度，老鼠要識「跳高」至食到，試問咁點捉到老鼠呀？

唔怪得廣州鼠王前年獲邀來港「獻技」，短短一粒鐘就喺旺角區捉咗十七隻大老鼠；而食環署喺油尖旺區搞嘅「滅鼠大行動」睇得唔打得，搞咗九日至捉到兩隻老鼠。

食環署蛇王愈來愈懶，老鼠愈來愈猖狂，「蛇鼠一窩」，市民永無寧日。鬼咩，上樑不正下樑歪，食環署署長卓永興本身就係一條大懶蛇，佢嘅手下又點會勤力吖。計功夫茶話齋，食環署防治蟲鼠組不如索性改名做「蛇鼠一窩組」罷啦！