大年初二之嘛，鴨脷洲利東邨道有一架城巴上斜途中懷疑偷位越線轉彎失事，同一架落斜新巴迎頭相撞，新巴半邊車頭削去，司機險變肉醬，車身溶溶爛爛，乘客浴血當場。兩巴炒車更加禍及無辜，尾隨的士冷不提防炒埋一碟。呢單巴士車禍總共造成十三人受傷，不幸之中嘅大幸係好彩冇人新春誤闖枉死城。

事隔只不過一日咁大把，驚都未驚完，大年初三又整一劑杰撻撻。城門隧道往荃灣方向管道之內，再嚟一單巴士車禍，今次係兩架九巴自己友累鬥累。一架係大埔往荃灣嘅73X，另一架係上水往荃灣嘅278X。呢單巴士車禍害人更多，至少有二十五名傷者慘受血光之災。

因乜事幹再一次炒大鑊？運輸署署理副署長袁立本話喎，事發時由於有壞車停於城隧管道，一架巴士慢駛，另一架巴士可能收掣不及，撞向前面車尾導致意外。袁立本又話，署方已經要求巴士公司提交詳細報告，睇睇有乜嘢可以改善。

唉，報告報告，又係報告！大同小異嘅官腔不知聽過幾多次咯，有邊一份報告真係可以改善巴士安全㗎？功夫茶唔知巴士公司嘅報告係點寫嘅，淨係知道一個普遍現象，撞完巴士交報告，愈交愈撞愈恐怖！

喂喂喂，的而且確好恐怖㗎，唔計新年呢兩單吖，巴士剷上行人路又試過，掟彎翻車亦試過，撞死途人不顧而去竟然都試埋。見過鬼怕黑嘅香港人家陣有一個搭巴士自保錦囊，就係千祈唔好坐上層前排座位，因為隨時會飛出車外橫死街頭。

難得袁立本面相精奇，居然皮膚特厚唔怕臉紅，佢話喎，巴士係公共運輸工具，一單意外都嫌多。功夫茶想借問一聲，巴士奪命血淚史罄竹難書，枉死冤魂不知凡幾，運輸署到底做過乜嘢杜絕巴士公司再害人？嗱，你唔好話已經要求佢哋交報告呀，係人都知交報告只不過係敷衍塞責嘅官樣文章。你估交報告嘅作用就好似趨吉避凶燒衣紙咩，如果交報告等同貼靈符可以防止車禍殺人，功夫茶即刻吹雞呼籲全港市民一人交一份畀你！

有人認為，城隧炒車原因之一可能同司機長時間冇得休息有關，其中一個司機新春期間完全冇得放假，有機會係疲勞過度導致精神唔能夠集中。如果係咁，唔該袁立本唔好戇居居等人哋交報告，不如直截了當主動調查巴士公司嘅編更表。萬一袁立本過分戇居，唔知乜嘢叫做疲勞過度，功夫茶建議佢親身做一個實驗，十日十夜不眠不休留守運輸署長期作戰，咁就應該感受得到點解會有瞌眼瞓司機車毀人亡。

點都好啦，功夫茶提提運輸署，香港骨灰龕供不應求好渴市㗎，唔好害死咁多人啦！