等功夫茶同大家介紹一位猛人，呢位仁兄英文名叫做Law Lai Kau，估下佢中文名係乜吖嗱。羅禮教？唔係。老泥膠？唔係。正確答案係，攞嚟搞，請熱烈鼓掌歡迎！
攞嚟搞先生好勁o架，佢係財爺曾俊華十分重用嘅左右手，推動好多利民紓困嘅偉大措施。譬如話，啱啱喺預算案提出斥資一億四千萬嘅「就業導航試驗計劃」，就係攞嚟搞其中一項得意傑作。
呢個計劃非常之咁有創意，為咗解決「有工冇人做、有人冇工做」嘅錯配問題，攞嚟搞忽發奇想，以五千元獎金利誘失業人士應徵「冇人吼」工種。講到呢度，又等功夫茶同大家研究一個正字，「冇人吼」嘅正確寫法應該係「冇人齁」，不過「齁」字比較深，都係從俗算嘞，用番「冇人吼」。
攞獎金要有乜嘢條件呢？首先，至少失業一個月；其次，搵到月薪六千五百元以下全職工作；然後，返工返足三個月。只要符合三大條件，恭喜你，五千元獎金袋袋平安！
之不過咁，話明係攞嚟搞先生嘅得意傑作，梗係冇表面上睇得咁簡單。成個「就業導航試驗計劃」其實係奉行攞嚟搞主義，因為冇人吼工種未必一定係低收入行業，月薪定於六千五百元以下相當不切實際。譬如話，有花農出到月薪七千五百元招聘人手，甚至每月有一千元交通津貼，一樣冇人吼。再譬如話，有護老院出到月薪一萬元，誠徵護理都遇到極大困難。冇辦法，花農工作日曬雨淋翻土除草非常辛苦，照顧長者起居飲食大小二便更加係厭惡性工作，人工雖然唔太低，始終冇乜人肯做。
當然啦，低於月薪六千五百元嘅工種係有嘅，例如清潔工、洗碗工、打雜工諸如此類。問題係，第一，人係有惰性嘅，左計右計擰頭擰髻之下，當你發覺伸大手板攞綜援其實差唔得幾多咋喎，而且財爺再一次恩准出雙糧，咁你就好有機會唔稀罕微薄薪金加獎金。第二，記唔記得攞獎金其中一項條件係「全職工作」呀？低薪工種好多時候係以時薪計算嘅，並唔係全職，即係你洗碗洗到十隻指頭拗柴，你都冇資格領獎！
講到呢度，係咪覺得攞嚟搞先生嘅攞嚟搞主義非常之咁攞嚟搞？其實未算㗎，仲有一項細節有必要留意一下。所謂返工返足三個月攞獎金有少少誤導，因為獎金係分三期發放，返工第一日就有五百元，第二個月獲發一千五百元，第三個月攞埋餘下三千元。換言之，只要你蠱蠱惑惑厚臉皮，你攞咗第一期五百元就可以人間蒸發。你話嘞，送錢餵懶蟲，係咪攞嚟搞？
即係咁，冇人吼工種不外乎四大死因，人工低、工時長、交通遠以及厭惡性，政府如果唔係對症下藥，派獎金利誘係於事無補嘅。就算利誘有效，都係短期貨仔，做完三個月，攞咗五千銀，拍拍屁股鬆人！
所以話啫，曾俊華真係識英雄重英雄o架，重用Law Lai Kau反映鬍鬚曾一樣係攞嚟搞主義嘅忠實信徒。