不如睇睇滲水辦到底係乜傢伙先咋。○四年喎，食環署同屋宇署忽然好心，話要專門處理私人樓宇嘅滲水問題，所以就攜手合作成立滲水辦嘞。好心無疑係好心，可惜吖，大寶號個名真係改得差，「聯合滲水」喎，搞到你以為呢個辦事處甩甩漏漏齊齊滲水。

改壞名有時都唔係好緊要，日本人好多都叫做大卷次子或者吉村富郎㗎啦，問題其實不大，反而生壞命呢家嘢濕滯。乜嘢叫做生壞命？即係咁，食環署同屋宇署聯合揸莊吖嘛，講得好聽係雙劍合璧，講得難聽係同床異夢。功夫茶成日都講，多老母等於冇老母，兩個老母嘅滲水辦天生注定冇運行。

事實上又的而且確係咁喎，申訴專員公署不止一次狠批滲水辦失職，處理滲水個案無理拖延，效率差到無倫。呢嗱嗱嗱，舊債未還，新債又到，再有兩名苦主投訴，向滲水辦求助遲遲解決唔到問題。

第一個苦主係青衣青華苑住客游小姐，○七年起單位滲水，想搵滲水辦幫手咩，簡直阿崩叫狗愈叫愈走，打極電話都冇人聽。事隔三年嘞，游小姐最終向申訴署投訴，滲水辦先至回覆話，由於不停轉換調查員，所以處理過程拖長咗。

另一個苦主係購入荃灣荃錦中心嘅趙女士，單位天花石屎剝落，諗住搵滲水辦啦，哈，呢班大帝居然話樓上唔畀入屋測試，所以冇晒辦法喎。

講到呢度，功夫茶記起另一單個案。曾經做過屋宇署署長嘅退休高官蔡宇略，四年來不斷玩殘樓下住客，因為佢老哥嘅太子道豪宅涉嫌經常滲水，滲呀滲，滴呀滴，總而言之污水長流，樓下住客畀佢害到雞毛鴨血，日夜煎熬，晚晚失眠。荒謬嘅係，身為屋宇署前署長嘅蔡宇略居然耍手擰頭死口否認滲水同自己單位有關，當然更加唔肯幫樓下鄰居解決問題。

見微可以知著，連前署長都咁不負責任，屋宇署自然有樣學樣，辦事作風亦係得過且過。至於屋宇署轄下嘅滲水辦，更加唔使多講，上樑不正下樑歪吖嘛，梗係懶得就懶啦！

計功夫茶話齋，一件污，兩件穢，反正滲水辦改壞名，不如索性再改一改名，打正旗號叫做「聯合潛水辦事處」，咁咪攞正牌潛水蛇王囉！