香港曾經被譽為亞洲足球王國，不久前離世嘅尹志強更加係亞洲第一中鋒，可惜十幾二十年以來球壇變得一潭死水，莫講話球迷痛心疾首吖，即使普普通通香港人，亦會覺得非常冇面。人哋問你，香港足球世界排名第幾呀？一係唔識答，一係搵窿捐，排名一百三十七呢個答案好瘀皮啫！

點解亞洲足球王國會墮落為寰球魚腩部隊？有冇辦法起死回生？哈，唔知係痛定思痛定係知恥近乎勇，特區政府耗資一百三十萬元進行足球發展研究，下個月就會向立法會提交報告以及建議，屆時咯喎，將會第一次出現本地足球政策。

唉，唔知大家點睇，功夫茶就覺得呢一百三十萬使得好冤枉。發展足球來來去去就係三大要素，第一係資金，第二係人才，第三係制度。三大要素之中又以資金最重要。知唔知政府每年資助足球運動嘅撥款係幾多？區區七百萬咋，老友！

人哋外國一個球星年薪都過千萬啦，經營一支球隊講嘅係億億聲，搞成個聯賽更加唔在講，根本就係天文數字。香港掟七百萬出嚟就話係資助足球運動，簡直笑爆嘴。

聽講，香港足球總會已經向負責研究嘅顧問提出商業化概念，建議成立一支「尖子球隊」進軍中超聯賽，而且爭取內地頂尖球隊來港比賽提升吸引力，長遠可倣效英超將球隊上市，令港人成為球會股東，將足球重新打造成為香港最關注嘅運動項目。

呢嗱嗱嗱，唔好怪功夫茶又潑冷水。喂，你唔係搞活成個球壇，淨係成立一支球隊，有冇荒謬咗少少？其次咯喎，中國足球冇嘢叻，假波黑哨最耍家，進軍中超聯會唔會學壞o架？最令人擔心嘅仲係，即使有一支尖子球隊，如果冇全盤青訓配合，無以為繼呀！

計功夫茶話齋，振興足球話易唔易、話難唔難，政府只要肯撥出一筆龐大資金作為起步之用，然後勒令足總徹底改革，香港足球未必會絕望。點解要改革足總？因為呢個機構因循苟且，長期積弊之下直接導致香港球壇死氣沉沉。打個譬喻吖，如果政府無能，市民一定冇運行。足總就係球壇嘅無能政府，領導如果唔換血，制度如果唔改革，球員踢來踢去都係一條鹹魚。

即係咁，振興足球唔可以靠傻瓜，如果你以為耗資一百三十萬搞一份研究報告就可以令到香港足球嘅世界排名谷底反彈，功夫茶贈你三個字：咪傻啦！