呢嗱，九龍太子道西有幢加多利大廈，住二樓嘅鄔女士○六年十月發現樓上滲水，佢多次向屋宇署同食環署合組嘅聯合滲水辦事處投訴，該處○七年做咗兩次蓄水測試之後證實，滲水係因為上層單位嘅工人廁所地台防水設施有問題。

豪宅單位搞成咁，都算唔好彩咯，而更唔好彩嘅係鄔女士遇到個惡鄰居。雖然有關部門多次去信滲水單位嘅業主要求修葺地台防水設施，但業主居然睬都懶睬，乜都唔做，結果滲水愈來愈犀利。現場所見，鄔女士廚房橫樑石屎嚴重剝落，水漬斑斑，要掛幾個透明密實袋接滴落嚟嘅污水，飽受滲漏滋擾不特止，最怕係樓宇結構受影響，連生命安全都冇保障。

嘩，樓上住嘅係何方神聖，巴閉到可以當政府部門冇到？嗱，講都冇人信，搞到樓下住戶冇覺好瞓嘅惡鄰居，竟然係退咗休嘅屋宇署前署長蔡宇略。

蔡宇略做過屋宇署署長，冇理由唔知滲水問題不斷惡化，會影響樓宇結構安全，甚至可能導致死人冧樓。佢更加冇理由唔知，業主有承擔維修樓宇嘅責任。當局幾次要求佢修葺地台防水設施，但問題擾攘咗近四年都未解決，唔通佢退休後仲享有特權，可以有法不依？

鄔女士忍無可忍之下，寫信畀申訴專員公署，質疑事件中係咪有人官官相衞。申訴署○八年底介入調查，發現滲漏問題拖咗多年，係因為蔡宇略嘅單位業主「採取不合作態度」，先係否認地台防水設施欠妥，跟住又賴滲水源頭喺高層單位，甚至幾次拒絕政府人員入屋再做蓄水測試。申訴署直斥呢啲所作所為「令人大感遺憾」。不過，你有你遺憾，蔡宇略依然故我，一於少理。

查實，蔡宇略已經唔係第一次令人遺憾嘞。當年佢買入呢個單位時仲未退休，因為賣家唔肯清拆僭建嘅地台，佢竟然派下屬喺返工時間幫自己評估清拆單位僭建物嘅費用，畀下屬投訴濫權。當時嘅規劃環境地政局批評佢公私混淆，仲要佢退番成萬蚊估價費用，蔡宇略卒之要就事件令政府尷尬表示遺憾。可能個朵臭晒，佢退休嗰日，署方搞咗個歡送茶會，但係畀員工「杯葛」，出席嘅只得小貓兩三隻。

估唔到呢個前高官死性不改，在位時濫權不特止，退咗休仲玩特權。自己單位滲水，卻拒絕承擔身為業主嘅責任，滋擾鄰居不以為恥，甚至抗拒政府部門執法，簡直惡得交關。

一單是非分明嘅滲水事件，居然拖咗咁多年都未解決，為苦主帶嚟咁多煩惱，到底係因為蔡宇略有特權，定係舊下屬因為佢嘅「餘威」，唔敢揸正嚟做？當局必須向市民交代清楚。如果個個退休高官都好似佢咁，香港仲成世界嘅？