早排功夫茶話回鄉卡號碼畫蛇添足玩殘港人。公安部出入境管理局前日喺官方網站公布，正研究回鄉卡實行終身號碼，徹底解決因換卡導致新舊卡號碼尾數變化嘅問題，證件號碼唔一致，為港澳居民喺內地投資、購房等帶嚟諸多不便。

從善如流係好事，撥亂反正嘅措施遲到總好過冇到。不過，呢啲擾民措施根本就唔應該出台，盞累人累物。早知今日，又何必當初呢？既然內地當局有心一了百了解決問題，唔該拿拿臨做嘢，以免更多港人無所適從，煩到抽筋。

查實，呢單嘢純粹係內地有關部門多此一舉所致。嗱，廣東省公安廳九九年開始向港澳人士簽發有效期十年嘅回鄉卡，舊年開始，唔少人張卡已到期，陸續開始更換。

回鄉卡到期就應該換，啱數吖。點知發卡部門神神化化咁將新卡號碼最後兩個數字一律由「00」改為「01」，害到唔少喺內地生活嘅港人雞毛鴨血。

咪睇小呢張卡呀，去銀行開戶靠佢，買賣樓宇又靠佢，換工商執照、駕駛執照、繼承遺產、結婚離婚，幾乎辦親手續都要靠佢。

問題係，雖然你仲叫「陳大文」，但回鄉卡最後兩個數字唔同，即係兩個號碼，人哋梗係當你係另一個同名同姓嘅人，驚有蠱惑啦。講唔清？咪報警送去派出所講清楚囉。

想驗明正身？得！不過唔止要破財，仲好鬼死煩添。嗱，先交一百五十至二百蚊向中旅社申請一份證明書，確定兩個回鄉卡號碼屬同一個人，跟手要再畀二千幾蚊委託內地司法部門認可嘅律師做公證，要一至兩個星期至搞得掂。而且每次公證只供一次使用，下次辦手續，唔該由頭再嚟過，你話煩唔煩吖。

內地公安部門解釋話，咁做係想保持回鄉卡嘅獨立性，方便佢哋一睇最後個號碼就知持卡人換過幾次卡喎。唔係啩？作為發證部門，居然唔知道回鄉卡仲係港人喺內地辦理各種手續嘅身份證明文件，以為獨沽一味只能用於出入境，只諗到自己部門嘅行政方便，結果令到大批港人面對不便同困擾。

再講，家陣科技咁先進，撳吓電腦資料已一目了然。舉手之勞啫，仲要靠肉眼睇最後兩個數字，唔通真係時光倒流？

事件處理牽涉到港人喺內地嘅合法權益，影響重大深遠。如果唔盡快解決，舊卡已陸續到期，只會有愈來愈多港人因為呢項擾民措施被玩殘，唔係講玩㗎。