冇錯，《歲月神偷》係得到官方注資，之不過咁，呢一套電影有可能係萬中無一嘅異數，其他電影未必咁好彩。點解咁講呢？事關電影發展基金對於一般演藝界人士冇乜特別作用，有能力嘅唔想申請，冇能力嘅唔准申請，講起上嚟得啖笑。

呢嗱，等功夫茶同大家略略介紹一下電影發展基金嘅申請條件。首先，你要有經驗，監製或者導演必須曾經完成拍攝最少兩部供本港戲院放映嘅電影。其次，製作費唔可以超過一千五百萬，資助金額上限係六百萬。然後，審批標準係電影有希望賺錢，蝕硬嗰隻諗都唔使諗。而最攞膽嘅係，電影人無論賺蝕都要還錢。

假設功夫茶係導演吖，自己又有豐富經驗，電影又有機會賺錢，點解唔搵出手疏爽嘅老細投資？點解要搵麻麻煩煩嘅官僚幫手？搵得政府幫手嘅，十居其九係冇乜把握有錢賺嘅小本製作，吖，官老爺又嫌三嫌四嫌你唔湊米氣，一毫子都唔批畀你，死得。

好嘞，當佢皇恩浩蕩真係瞇埋眼批出資金，喂，講到明係冇乜把握有錢賺嘅小本製作，如果蝕大本，竟然要還錢？咁咪等於去完賭場輸清光仲要欠落大耳窿一屁股債？所以話啫，電影發展基金最正確嘅名稱其實係「電影借錢基金」，既唔係扶助，亦唔係投資，純粹放債。

講到呢度，大家明白點解《歲月神偷》有可能係萬中無一嘅異數啦。其他電影咯喎，未必有獎贏，未必有錢賺，官老爺借錢畀你拍電影，名義上係愛你，實際上係害你，除非你敢欠債不還遠走高飛。

演藝界埋怨申請電影基金手續繁複，錢又遲遲未到手，甚至出現過拍完戲都未見官老爺開水喉嘅尷尬場面，導演江湖救急焗住將自己物業向銀行抵押做按揭借錢。計功夫茶話齋，呢啲都係次要，最重要嘅係電影發展局徹底失職，對於發展本地電影毫無意義。打個譬喻吖，足球隊出錢出力培訓足球員，絕對唔會同個足球員話，嗱，你一定要做球星呀，即使你踢跛腳掛靴收山，你都要清還欠落足球隊嘅培訓費用呀！

唉，功夫茶愈諗愈唔明，既然電影發展局唔想浪費公帑，所以設立咁多無無謂謂嘅關卡，點解唔索性打正旗號做一個真真正正嘅投資者？所謂投資，就係同電影人搭埋一條船，賺就一齊賺，蝕又一齊蝕，咁雙方咪有偈傾囉。家陣純粹放債，老實講，電影人直接問銀行借錢冇咁嬲！