之不過咁，鄭局長話就話識得玩facebook，但係佢嘅玩法又相當騎呢，名義上設立論壇開誠布公諮詢民意，實際上限時三粒鐘畀你自說自話網上留言，佢老人家全程石頭一樣冇即時回應。喂，打個譬喻吖，功夫茶同你打聲招呼講一句「你好」，你都冇理由三粒鐘唔瞅唔睬啩。所以網民批評，鄭局長係假諮詢、真做騷，所謂溝通缺乏誠意。

更加騎呢嘅係，話明係社交網站吖嘛，梗係交朋結友㗎啦，哈，鄭汝樺唔知係少女情懷太怕醜，定係古老石山太保守，居然一律拒絕網民add佢做朋友。計功夫茶話齋，網民未必一定係衰人，唔會個個口甜舌滑約網友出街然後為非作歹，鄭局長唔使咁驚青喎。就係因為冷若冰霜嘅局長拒人於千里之外，facebook出現「我想add鄭汝樺」群組，簡直笑爆嘴。

話時話，好心高官唔好咁自閉啦，鄭汝樺含羞答答玩facebook已經異於常人，其他高官更加故步自封，完全唔識得利用互聯網對外溝通。於是乎，好事之徒就有可乘之機嘞，網上出現大量自稱某某高官嘅偽冒戶口，包括「假曾蔭權」、「假曾俊華」甚至乎「假鄭汝樺」。

講開「假鄭汝樺」確係滑稽到極，戶口形容自己「和睦相處，笑看人生百態」，現時感情狀況「複雜」，希望結識新朋友，男女不拘，又加入多個支持興建高鐵嘅群組。最絕核嘅係，呢個冒名頂替嘅Ａ貨局長add咗好多政要權貴做朋友，而呢啲理應眉精眼企嘅政要權貴居然又戇居居上當喎，立法會議員陳克勤、馮檢基、張國柱以及自由黨常委田北辰竟然係「假鄭汝樺」嘅朋友。

其中一個被騙苦主陳克勤就話嘞，事件反映年輕網民對港府施政不滿，又缺乏渠道表達意見，所以透過自己熟悉嘅方法惡搞一眾高官。陳議員仲話，促請各高官盡快設立官方facebook帳戶與年輕人溝通，吸納及疏導佢哋嘅意見，而唔係好似「真鄭汝樺」咁樣開設限時版facebook論壇。

唉，講到尾，又係官僚作風累事，你黑箱作業吖嘛，你一意孤行吖嘛，你唔聽意見吖嘛，滿腔怨憤嘅網民咪借你個大寶號玩殘政治人物囉，呢啲唔係叫做欺世盜名，而係盜名欺世，盜用高官名堂欺騙世人。

如果功夫茶係「假曾蔭權」，facebook個人狀態會係咁寫：最近好煩好亂，想改運又唔想掘窿種生基，起高鐵又唔想得罪後生仔，家陣開誠布公諮詢市民意見，有乜方法唔使騙財騙色都可以改善禮賓府風水？寶貴意見如獲採納，請你到寒舍ＢＢＱ燒雞翼！