唔知大家有冇同感，功夫茶愈來愈討厭收到內附大量宣傳單張嘅廣告信，一來覺得煩，二來唔環保。你知啦，廣告信基本上係廢物，話就話提供各種優惠，實際上十居其九嘥氣，你會唔會踏破鐵鞋走去山旮旯地方食個爛鬼早餐享受九折優惠吖？瞓多兩粒鐘好過。
宣傳單張可能係世界上最唔環保嘅發明，為咗一大堆冇人睇又冇人用嘅廢物，唔知幾多棵樹犧牲得不明不白。環保團體一直苦口婆心告誡世人，唔好浪費咁多紙張啦，做做好心救救地球，唔該吖！
好不幸，你有你告誡，佢有佢浪費，港鐵係其中一個頑劣分子。港鐵最近推出「戀愛星願」優惠，功夫茶完全冇興趣知道優惠券提供乜東東着數，因為斷估都係唔等使，淨係有興趣想知道又浪費咗幾多紙張。吖，整鬼佢吖，如果優惠券細細張都冇咁嬲，港鐵嘅設計居然係長過水蛇春，超過三十厘米長，闊度八厘米。有用就話啫，好多乘客攞完優惠券之後望兩望，戾手就丟落垃圾桶。更加該煨嘅係，優惠券採用唔能夠回收嘅熱感紙，即係一般收銀機用嘅傳真機紙。大佬，樹木無辜㗎，又唔係你殺父仇人，冇必要害到森林光禿禿啫！
環保團體計過數㗎嘞，以一個月推廣期推算，港鐵優惠券加加埋埋有八百七十公里長，足足沿住海岸線包圍整個香港。如果真係有「戀愛星願」，功夫茶嘅願望係港鐵愛香港多啲啲，愛地球多啲啲，愛人類多啲啲，唔好再做咁多破壞環境嘅戇居行為，避免製造垃圾塞爆堆填區。
話時話，曾蔭權咪誓神劈願話要打造六大優勢產業嘅，環保竟然亦係產業之一，如果唔係再一次喺污濁空氣之下吹水唔抹嘴，其實應該諗諗計仔防止濫發宣傳單張。
計功夫茶話齋，特區政府既然識得徵收膠袋稅，不如索性徵收單張稅，每次派出或者寄出一張宣傳單張就收錢，如果好似港鐵咁亂派唔能夠回收嘅優惠券，更加徵收懲罰性重稅，咁就睇怕可以收到阻嚇作用嘞。
環保產業千頭萬緒，送慳電膽又搞到狗血淋頭，如果煲呔曾懵然不知從何入手，功夫茶又有另一個提議，勒令政府高官帶頭放棄使用私家靚車，全人類改搭港鐵。高官搭港鐵一來減少汽車噴廢氣，二來咯喎，親自監督港鐵會唔會再做出亂派優惠券嘅反智動作吖嘛。
講開又講，雖然送慳電膽撞晒大板啫，曾蔭權唔使嚇到窒一窒喎，不妨諗諗其他環保大計。譬如話，政府部門帶頭全面改用噴水馬桶，呢個如廁工具好嘢嚟o架，年中慳番唔少廁紙，而且適合官員度橋，斷估曾氏宗親會唔會啱啱遇着剛剛又有親戚係馬桶大王啩！