邪邪邪！爸爸枉死已經傷心欲絕，家陣連媽媽都魂斷街頭！

尋日馬鞍山耀安邨發生一單功夫茶有生以來第一次聽到嘅離奇悲劇，一位年過七十老婆婆從天而降直墮地面，啱啱遇着剛剛砸到一位五十幾歲女途人，結果雙雙氣絕身亡。

唉，如果你話跌落街嗰個係自尋短見跳樓自殺，功夫茶肯定直斥其非，死人都冇面畀照樣鬧兩句：想死唔該死開啲，唔好累人累物累街坊！

之不過咁，聽講墮樓老婦唔係故意o架，可能係晾衫唔小心一失足成千古恨。既然係無心之失，咁就確係唔知道怪得邊一個，怪來怪去只可以怪責地心吸力。

呢一單不幸到極嘅罕見事故原來仲有一條旁枝，被砸死嗰位遇難者陳女士，其實係一宗工業意外嘅死者遺孀。○七年七月，銅鑼灣舊三越地盤天秤倒塌，陳女士嘅丈夫就係其中一個遇難者。

設身處地諗一諗，如果你係當事人仔女，連續發生咁慘絕人寰嘅血光之災，一次帶走爸爸，一次帶走媽媽，你大概會仰天長嘯：點解次次都係我！

功夫茶諗起老子《道德經》幾句說話，天地不仁，以萬物為芻狗，聖人不仁，以百姓為芻狗。關於老莊哲學，功夫茶自問係門外漢，淨係知道中國傳統有一套學說講「天人感應」，意思大概係話，人做得好，天對人好，人做得衰，天對人衰。就算到咗今時今日二十一世紀，周不時仍然有人講，人在做，天在看。

呢嗱嗱嗱，如果天人感應係講得通嘅，咁就唔該曾蔭權政府生生性性善待百姓，唔好畀機會天老爺覺得你做得衰，所以當百姓係芻狗吖嘛。退一步講，即使天人感應完全冇科學根據，善待百姓始終係好事，的而且確可以避免大量災禍。舉一個例吖，曾蔭權政府假如着緊百姓安危，兵貴神速將擲鏹狂徒繩之於法，咁咪冇鏹水彈傷人嘅災禍囉。

善待百姓其實仲有一個方法，就係好好教育市民，廣泛宣傳晾衫同抹窗安全意識。香港有好多人真係會以身犯險㗎，毫無安全設施之下做出不必要嘅危險動作，砰磅一嘢跌落街後果不堪設想。

即係咁，你可以唔信天人感應，但係你一定要信眾怒難犯，如果一個人做得衰，即使冇天譴，仍然有危險。民意調查一次又一次顯示，煲呔曾支持率不斷創新低，反映呢個哎吔政治家做得相當衰。做得衰嘅後果大家有目共睹嘞，董建華前車可鑑，一個人無情白事係會腳痛落台嘅。

點都好啦，人間慘事何其多，善待百姓免災禍，有天人感應又好，冇天人感應都好，功夫茶絕對唔想見到再有人跌落街砸死途人！