冬天游水其實幾好㗎，強身健體吖嘛。跑步唔係話唔好，本來都係強身健體嘅好辦法，可惜香港天氣有時真係玩死人，時冷時熱又潮濕，加上空氣污染嚴重，掟個西瓜落海都搵唔番藍天白雲，咁就濕滯夾閉翳。好似一年一度新春馬拉松咁吖，由於濕度高達百分之九十三以上，魔鬼賽道「升呢」地獄賽道，千幾人跪低，幾十人送院，其中三個仲話危殆添。聽到咁得人驚嘅另類賽果，你都咪話唔趕客。

話時話，曾蔭權其實都幾有號召力㗎，叫細路仔返屋企食飯嘅功力隨時勁過師奶大嬸，賀年短片一句「回家真好」之嘛，離家出走嘅警犬奀豬即刻浪子回頭，唔再做一隻流落街頭嘅警務狗員。照咁講，失蹤日久嘅藍天白雲都應該響應「回家真好」嘅呼籲吖，因乜解究阿崩叫狗、愈叫愈走？仲話環保係香港六大優勢產業之一？呃老襯唔好呃到咁出面好噃。

點都好啦，如果硬係要喺游水同跑步之間二擇其一，只要空氣污染問題一日未改善，功夫茶揀手之選一定係游水。之但係又咁，游水都要識得搵一個適合嘅泳池，事關康文署轄下公眾泳池非常搞嘢，名副其實乜鬼都有，一個唔覺意撞到正，後果同樣係濕滯夾閉翳。

呢嗱嗱嗱，尋日粉嶺暖水泳池又出現噴墨奇景，池水忽然之間變黑，簡直恐怖過摩西施展特異功能將河水變紅，嚇到泳客雞飛狗走，走慢半步少不免吞兩啖污水。點解原本清清澈澈嘅池水無端端會變黑嘅呢？唔通係凶兆？定係有人要學似摩西咁要求「香港法老」釋放同胞離開奴役之地？原來唔係，康文署事後解釋，由於泳池濾水系統故障，導致活性碳粉滲入池水。康文署又強調，活性碳粉一般對人體無害。

唉，雖然話唔係摩西借神力降十災啫，但係你都咪話唔係凶兆，事關的確好邪。你知啦，公眾泳池事故真係多到嘔，一時話有紅蟲，一時話有糞便，一時又話有隻雀仔跌落水，惹起不必要嘅禽流感疑雲。今次更加騎呢到噴墨，係咪寓意康文署黑過墨斗？定係天意示警「官不聊生」？又或者，凶兆嘅告誡對象其實係小市民，嗱，黑過墨斗嗰個係你呀，唔好再幫襯管理不善嘅政府設施喇，安全第一呀，命仔要緊嘛！

即係咁，跑步當然最怕空氣污染啦，其實游水都好驚池水污染，所以真係要識得搵一個適合嘅泳池，唔好有紅蟲，唔好有糞便，唔好有雀屍，唔好有碳粉。計功夫茶話齋，以後幫襯公眾泳池之前，最好向康文署當值職員問一問，唔該唔該借問聲，今日泳池開邊瓣？污染程度有幾高？一見唔對路，即刻掉頭走！