不過咁，盤生意筍就夠筍嘞，但一個唔好彩分分鐘搞出人命㗎。唔講唔知，依家鬧市天台燒烤場已經做到成行成市，顧客如雲。原來呢啲所謂燒烤場大部分屬於無牌經營，即係話消防呢類安全設施根本冇人監管，萬一發生火警，燒烤場變成焚化場，前年燒死四個人嘅旺角嘉禾大廈慘劇隨時會重演。

呢嗱，尖沙咀金馬倫道有幢商住大廈，約兩千呎嘅天台擺咗六、七個燒烤爐，每晚八點過後準時開檔，「廚房」就喺樓下，食品供應源源不絕。雖然收費唔平，位位二百二，但檔口喺正鬧市，根本唔憂做。

出入大廈唔方便？冇有怕，連大門密碼都提供埋，掂行掂過冇人理。大廈變咗冇掩雞籠不特止，至弊樓上晚晚嘈到拆天，公眾假期閒閒地要到三更半夜至收聲，住客冇覺好瞓，仲成日驚火燭，點頂吖？

更離譜嘅係，非法天台燒烤場已經遍地開花，連旺角都唔例外。有油尖旺區議員帶本報記者去睇過山東街同豉油街兩間非法天台燒烤場，其中一檔曾經被檢控，但生意照做可也，仲喺大廈門口戙起招牌兜客。有燒烤場甚至上網賣埋廣告添，直頭當法例冇到，明剃政府眼眉。

咁仲成世界嘅！明火晚晚喺天台燒，周圍大廈林立，萬一唔小心燒着易燃物品，火勢蔓延，到時火燒連環屋咪死得人多？非法天台燒烤場地等同鬧市炸彈，咁明顯嘅消防安全隱患，當局到底知唔知？係咪好似土瓜灣冧樓慘劇咁，要爆大鑊至執法？

其實，食環署亦知道呢兩間燒烤場未攞牌，過去一年收到近廿宗涉及違規經營嘅投訴，但署方居然聲稱「取證困難」喎，所以只做過兩次違例檢控，罰款一萬六千蚊。有冇離譜啲吖？廿宗投訴檢控兩次咁大把，一年平均計，每日罰幾十蚊，好似痕咁，抵過交牌費多多聲，咁樣嘅處罰，直頭要「多謝」食環署添啦。

法例規定，無牌食肆一經定罪，最高可判罰款五萬蚊同監禁半年。如果當局正視問題，加強巡查，從嚴執法，點會有人敢以身試法吖？天台燒烤場又點會開完一間又一間吖？

唉，呢個政府唔見棺材唔流淚，從來唔識吸取教訓。嗱，嘉禾大廈大火慘劇之後，當局拍晒心口話加強巡查樓宇消防設備。結果又畀本報踢爆講一套做一套，部分政府合署同街市嘅走火通道堆滿雜物，長期被堵塞，市民出入要搵命博。連自己地頭都布滿「計時炸彈」，旨意呢班官僚改善消防安全？嘥氣啦！

講番天台燒烤場嗰筆，既然喺網上賣晒廣告，食環署透過放蛇好容易令非法經營者斷正啫，一句「取證困難」就翹埋雙手乜都唔做，離譜啲啩？唔通要等發生沖天大火燒死人至做嘢？