今時今日無電不行，特區政府可以無人駕駛，你試下畀電力公司休息一日吖嗱，後果可以用災難嚟形容。萬一閣下住嘅地方停電，世界未必末日嘅，地球應該都會轉，不過生活將會變得非常困難，又冇電視睇，又冇電腦玩，上上落落又要行樓梯，簡直想死。好衰唔衰，停電呢家嘢周不時都會發生。

就好似領匯負責管理嘅青衣長發邨街市咁吖，尋日喎，話要進行供電測試，所以要停電六粒鐘，時間係凌晨十二點到朝早六點。你知啦，街市要處理好多凍肉，停電即係雪櫃被廢武功，街市檔戶十分麻煩。如果你係賣魚嘅，慘嘞，魚缸冇氣泵，活魚隨時變死魚，海鮮變得唔新鮮。本來停電六粒鐘已經惡頂，更加離譜嘅係，整鬼佢吖，過咗原定停電時間之後，長發邨街市到咗下晝兩點仍然未恢復電力供應！

嗱嗱嗱，大家設身處地諗一諗，如果你係街市檔戶，眼見凍肉慢慢融雪，然後逐漸變質，少不免孳生細菌，你會有乜嘢反應吖？當然係無名火起三千丈，氣沖沖走去搵領匯算帳啦！

好嘞，大家不如又估下，受到損失慘重嘅檔戶質詢之後，領匯有乜嘢反應吖嗱？功夫茶相信大家點估都估唔到，領匯職員居然叫檔戶照常營業繼續開舖做生意！

喂，雪櫃廢咗，凍肉融晒，海鮮反肚，莫講話唔慌賣得出，即使賣得出，隨時食壞人。領匯叫人繼續開舖，即係教人學做黑店，明知貨物變質腐壞，埋沒良心一於照賣。

唉，領匯惟利是圖都出晒名㗎嘞，瘋狂加租呢家嘢害到好多人冇啖好食，勢估唔到原來可以無良成咁。教人做黑店嘅動機好明顯，唔想因為長時間停電而賠償損失吖嘛，咪叫檔戶照賣劣貨欺騙顧客囉。

其中一檔專賣火鍋用料嘅華哥講得啱，佢批評領匯靠害之餘又質問：「我啲嘢食搞成咁，如果我啲客買番去食，食死人，入邊個數？」

係囉，入邊個數？功夫茶打死都唔信領匯肯負責，九成又係檔戶食死貓。如果領匯轉死性肯負責，大家唔好咁開心住，呢個睇怕係世界末日嘅凶兆。

話時話，事件應該未完，因為長發邨街市嘅供電測試十分騎呢，唔係停電一晚就搞得掂，而係要連續幾晚停電。計功夫茶話齋，家陣一殼眼淚嘅檔戶不如考慮休息幾日，盡量將傷害程度減至最低，好過畀領匯害完一鑊又一鑊吖！