講番香港呢單人間慘劇，死者Amy Rose Coxall係十五歲英籍富家女，前日同幾個同學仔去到屯門龍鼓灘國際小型賽車場慶祝新年。小型賽車又叫高卡車，本來確係幾好玩嘅，風馳電掣左片右片十分刺激，不過有一個問題，就係機件外露，玩家絕對唔應該戴頸巾或者披頭散髮，因為好容易捲入引擎組件造成危險。

非常之咁唔好彩，Amy當時戴咗一條頸巾，而唔知點解喎，車場員工居然冇人提醒一句，更加冇人出手阻止。好嘞，悲劇就咁發生，高卡車開行途中，懷疑頸巾被大風吹至背後，頸巾末端楔入車尾引擎組件，再被齒輪車鏈緊纏拉扯。愈扯愈緊之下，無力鬆開安全帶脫身自救嘅Amy窒息而死。

十五歲芳華正茂，無端端香消玉殞，稍為有惻隱之心都會替死者家屬感到難過。莫講話家屬，死者同學仔一樣係傷心欲絕，有人甚至自責內疚，怨恨自己當時救佢唔到。

既然發生奪命車禍，自必然要追究責任，小型賽車場毫無疑問涉嫌疏忽。喂，安全指引寫到明高卡車駕駛者唔可以戴頸巾吖嘛，你有乜可能任由小朋友自墮死亡陷阱？另外咯喎，政府部門到底有冇好好監管小型賽車場嘅呢？

講起就把幾火，一見有事發生，典型嘅官僚嘴臉全部現形獻世。

康文署話喎，由於署方冇資助有關活動、課程以及場地營運，所以唔關佢哋事。運輸署話喎，由於小型賽車並非公路行駛，所以唔關佢哋事。機電工程署話喎，由於小型賽車唔係機動遊戲，所以唔關佢哋事。

呢嗱，呢啲就叫做金蟬脫殼縮骨功，懶理市民死活，只知龜縮自保。總而言之，高卡車安全第二，官老爺卸膊第一。由於冇人認頭，政府新聞處最後交畀民政事務局發言人回應咗幾句，不過都係廢話一類，淨係話出事車場由香港小型賽車會負責監管。

到咗尋日咯喎，哈，唔知係良心發現定係點，幾大政府部門忽然熱心，浩浩蕩蕩一齊操去小型賽車場了解情況，仲煞有介事要求對方提交報告，然後再商討安全措施咁話。

提交報告唔係話唔好，之不過咁，以往經驗話畀大家聽，即使係發生喺公路上面嘅車禍，好似巴士相撞咁大劑吖，交咗報告就不了了之㗎喇。今次高卡車奪命事件，話就話交報告啫，實際上有冇意義真係好難講。

計功夫茶話齋，最有效嘅改善辦法係咁樣，臨危授命交由民政事務局局長親自落場試駕高卡車，做出各種各樣危險動作，只要最終能夠全身而退，一定可以諗出萬無一失嘅安全措施。

大家可能會問，咦，如果局長大人唔覺意撞到甩皮甩骨，咁點算？查實，仲好，見過鬼怕黑吖嘛，安全措施自然會做到更加滴水不漏！