今次不幸事件，引起市民對公屋晾衫設備嘅關注。本報記者探訪多個屋邨，發現晾衫設備原來好有問題，晾衫架好多裝喺廚房外牆嘅抽油煙機下底，一晾衫，一開機，滴滴滴滴滴，隨時為你件衫加添油漬點綴。

件衫染油漬都仲係小事，最怕嘅係影響住戶安全。以今次出事嘅耀安邨為例，因為個窗位置太高，晾衫時要考驗你嘅高度同伸展能力，甚至擔櫈仔嚟補救先天不足。此外，唔少屋邨單位仲係用緊俗稱「三支香」嘅舊式晾衫架，啲住戶抽住成串衫探身窗外，萬一跣腳咯喎……真係諗起都覺得牙煙。

屋邨晾衫架亂七八糟，其實有唔少係違規安裝，以葵涌葵興邨為例，就有超過一半單位喺外牆加裝晾衫架。業內人士反映，有住戶為咗慳錢同貪方便，會喺安裝晾衫架時偷工減料，譬如本應打四粒爆炸螺絲嘅只打兩粒，用吓用吓，唔好話個人墮樓咁大劑，淨係跌個架落去都足以傷人奪命啦。對於呢啲違規行為，啲官老爺到底係懵然不知，定係多一事不如少一事嘅官病發作，側側膊，詐唔知呢？

等功夫茶話你知，啲官老爺係冇理由唔知嘅，只係一直視而不見，見而不理啫。早喺二○○四年，天水圍天華邨已經發生過婦人晾衫時跌落街嘅慘劇。但係記者最近到天華邨巡查，發現仍有住戶隨隨便便喺外牆加裝鐵通，有住戶求求其其將晾衫架放喺鋁窗上面，有人將晾衫架駁長，亦有人用繩綁喺外牆膠喉上面晾衫，各師各法，蔚為奇觀。

由此可見，啲官一直以來都無做嘢，死咗人都唔改過。難怪公屋聯會批評，唔符合規定嘅晾衫架喺屋邨隨處可見，但房屋署最多只會向違規住戶發出警告信，好少聽過有住戶因此被檢控或終止租約。

唉，曾幾何時，香港地以「最安全城市」自居，但係喺特區政府管治下，近年成個城市危機四伏，到處都有道路陷阱、建築陷阱、家居陷阱。坐坐吓車可以畀醉駕司機撞死，行行吓街可以畀危險招牌砸死，瞓瞓吓覺可以成幢樓冧落嚟壓死，家陣，就連晾衫都要搵命博。功夫茶只好借佛家嘅一句老話敬告讀者，阿彌陀佛，自求多福。