紅隧日日塞車，係人都知問題出喺紅隧、東隧同西隧嘅收費差異，如果三條過海隧道收費相差無幾，一切迎刃而解唔使煩。問題本來並唔複雜，但港府特登委託顧問公司進行所謂分流研究，原定舊年年底搞掂，點知依家仲未有結論。當局預料顧問報告最快都要今年第二季至有得睇，各位揸車人士惟有繼續忍耐喇。

雖然研究報告仲未出爐，但據講顧問公司將提出多項降低紅隧車流嘅建議，包括調高貨車收費，以免重型車輛造成阻塞喎。利用選擇性加費紓緩塞車，咪即係喺貨車司機個袋搶錢？有貨運業團體批評建議不切實際，話明唔排除發起堵塞行動抗議，隨時嚟多劑交通大癱瘓，你話港府係咪添煩添亂吖。

其實，用腦諗吓就知呢招唔掂啦。嗱，今日紅隧加價，聽日如果東、西兩隧照辦煮碗加埋一份，大家鬥加，形成惡性循環，豈不是永無寧日？咁又點樣分流呀？港府花費納稅人金錢請顧問公司諗埋呢啲屎橋獻世，你話啲公帑係咪花得冤枉吖？其實講到尾都係嗰句，當局根本冇心解決紅隧長期塞車嘅問題。港府做嘢嚟嚟去去都係呢招，事無大小先請顧問「研究」一大輪，話就話聽吓專家意見，實情係想卸膊，班高官自己乜都唔使做，有起事嚟可以搵顧問公司做擋箭牌。

喂！下下搵顧問公司，鑊鑊都係佢哋擋駕，既然係咁，乜都由顧問公司搞掂咪得囉，納稅人仲使乜出咁高人工請你班官吖？仲話高官問責制添，高官卸責制就真。

更弊嘅係，顧問公司研究結果往往得啖笑。呢，早幾年醫管局請咗間顧問公司研究管理層人工，結論居然係，醫管局行政總裁等高層人工比「市場水平」低咗一半，建議大幅加薪。其實，醫管局管理層人工超高已經係街知巷聞，顧問公司咁搞笑嘅建議都噏得出，簡直係荒謬絕倫！

講番隧道嗰筆，本港三條過海隧道入面，港府擁有嘅紅隧長期擠迫不堪，而私營嘅東、西隧卻車流稀疏，問題就係因為呢兩條私隧收費過高。多年來各界提出過唔少建議，包括增建隧道；將政府隧道免費開放，逼私隧調低收費；以贖買方式提前結束私隧專營權，透過統一管理一勞永逸解決隧道加價同紅隧塞車嘅問題。可惜，你有你建議，佢有佢裝聾扮啞，港府淨係識聘請顧問公司研究，卒之研究出一條屎橋。

計功夫茶話齋，唔使理顧問報告噏乜，索性你又加，我又加，隧道費統統狂加幾倍，到時水靜鵝飛，包保三條隧道日日暢通無阻，咁咪唔使煩咯，笨！