如無意外，裁判法院唔會變得面目全非，聽講校方非常尊重原有面貌，小心翼翼根據發展局指引進行活化保育，盡量保留建築特色，例如鐵欄、天花以及地板等等。望就係咁望啦，大家記唔記得中區警署話要活化，卒之拋出一個鬼五馬六嘅「竹棚」設計？方案一出，舉世嘩然，嚇到街坊媽媽聲！

薩凡納今年九月就會開班授徒，前日舉行第一場入學諮詢會，簡介入學資格同埋學費減免等等詳情。講真，學費都幾貴㗎，一年大約二十二萬元，讀完四年畢業盛惠八十六萬。貴就係貴，不過仍然有唔少捧場客，有家長不惜工本打算向銀行借款一百萬畀寶貝仔報讀。

照咁睇，香港六大優勢產業之一嘅創意產業，咪有希望好夢成真囉？啱啱先至喺預算案大吹大擂聲稱培育更多創意人才嘅財爺曾俊華，咪唔會面目無光囉？打造創意之都咪唔會再一次淪為笑柄囉？

唉，表面上的確係幾風光嘅，不過實際上就唔係咁過癮嘞，不如聽聽有意報讀薩凡納嘅同學仔點樣講吖。

有一位姓陳嘅學生哥，舊年七月喺香港專業教育學院平面設計系畢業，畢業半年以來只係接過一份薪金七百元嘅短期工作咁大把，陳同學係咁樣講嘅：「喺香港好難搵到同設計有關嘅工作。」打算向銀行借一百萬供書教學嘅就係陳伯母，佢好無奈咁話：「個仔好想喺藝術方面發展，喺香港又搵唔到食，惟有希望透過修讀薩凡納嘅課程，增加日後去外國發展嘅機會。」換言之，創意人才將會肥水流向別人田。

另外又有一位女同學認為，特區政府投放喺藝術發展嘅資源太少，所以打算報讀國際認受性較高嘅薩凡納，畢業之後去台灣謀求發展機會。即係話，香港唔係創意人才嗰杯茶。

收到唔收到？明解唔明解？薩凡納只不過係學生哥心目中嘅踏腳石，因為官老爺推動嘅所謂創意產業純粹畫餅充飢，所以學成之後一於遠走高飛！

講到畫餅充飢，鬍鬚曾嘅「畫功」其實都唔錯，即使未算大師，起碼半個畫家。佢喺預算案話喎，「創意香港」已於去年成立，支援本地創意產業，包括繼續透過ＣＥＰＡ開拓內地市場，以及研究推動創意產業發展嘅策略；此外，政府亦會將荷李活道前警察宿舍活化為一個推動本地創意產業嘅中心，並且短期內邀請有興趣嘅團體提交建議書。

嗱嗱嗱，畫餅真係畫得幾好㗎，又呢樣又嗰樣，又天花又龍鳳。可惜吖，回歸以來高官業績太差，空中樓閣十居其九紙上談兵，功夫茶奉勸大家一句，聽下好喇，冇期望先至唔會大失所望。