好嘢！奶茶王原來胸懷大志，佢話要將港式奶茶帶向全世界發揚光大！

邊個係奶茶王呢？即係咁，舊年八月香港舉辦第一屆茶展，當中有一項「金茶王大賽」，畀機會眾多沖茶高手一爭長短。比賽結果爆出冷門，隱世小店贏盡名牌老字號，公司組冠軍係元朗洪水橋嘅大發餐廳，靈魂人物彭敬威同沖茶師傅賴旺明一炮而紅。

大發餐廳真係紅㗎，原本日賣五百杯奶茶，家陣暴升至二千杯。茶香引得曾蔭權都心思思想去洪水橋歎番杯絲襪奶茶，不過事前走漏風聲，搞到記者恭候大駕光臨，先至嚇到佢過門而不入之嘛。之不過咁，功夫茶唔敢肯定後來煲呔曾有冇再一次靜雞雞幫襯。

據第三代負責人彭敬威所講，大發餐廳打算喺活化在即嘅中環街市開分店，初步構思係星巴克裝修賣港式奶茶，長遠目標係效法台式奶茶特許經營。

話時話，曾經有人建議，將港式茶餐廳申請列入聯合國人類非物質文化遺產。計功夫茶話齋，其實擁有獨特風味嘅港式奶茶都應該獨立申請，一旦申請成功，咁就為港爭光。

特區政府咪話要搞六大優勢產業嘅，又話要推動本土經濟，其實茶餐廳同港式奶茶就係前途無限嘅產業。喂，知唔知香港人每日飲幾多杯奶茶？答案係二百萬杯，可見呢一門生意商機無限。

不過可惜吖，如果你唔係參賽冠軍奶茶王，你可能冇啖好食，畢竟一直以來沖茶師傅地位卑微。全港大概有六千間茶餐廳，超過二萬名沖茶從業員，新入行月薪只不過六、七千元，師傅級亦係二萬元左右㗎咋。大家知唔知道，一個品酒師嘅起薪點係幾多？閒閒地萬幾二萬。

有冇辦法提升奶茶師傅地位，從而將港式奶茶真真正正發揚光大？一個必不可少嘅做法係設立完善嘅培訓系統，以及訂定專業資歷架構。即係話，你唔一定要參加比賽攞冠軍先至一舉成名天下知，你可以透過進修考取專業銜頭，贏得茶迷嘅尊重。

呢嗱嗱嗱，據功夫茶所知，由於品酒師愈來愈吃香，職業訓練局係有開設品酒證書課程嘅，提供深入嘅進修途徑。口口聲聲推動本土經濟嘅政府官僚，可唔可以開設沖製港式奶茶證書課程呢？理論上當然可以啦，問題係肯唔肯做嘅啫。

講真，港式絲襪奶茶絕對係香港人嘅驕傲，嗰一種滑，嗰一種香，搵勻全世界搵唔到。既然元朗洪水橋奶茶王誓要大展拳腳闖一番新天地，政府冇理由唔幫幫手推出政策配合啫，唔係叫你專幫個別一間餐廳，而係應該大力扶持茶餐廳文化，起碼畀沖茶師傅一個可以出人頭地嘅專業頭銜。如果唔係咯喎，推動本土經濟又係空口講白話，政府官僚再一次走寶！