東方報業集團記者一年一度趁過年去黃大仙祠為香港求籤，求問政治前景，得出一支「蔡母遇險」下下籤，預示狂風驟雨之下「持篙撐去失西東」，寓意掌舵人曾蔭權迷失方向。唉，黃大仙一向好靈驗㗎，呢鋪大煲夾大鑊，功夫茶忽然之間諗起迷迷糊糊撞冰山嘅鐵達尼號，曾船長唔知會唔會棄船。

其實諗落，黃大仙靈籤冇乜可能唔靈。大家都知啦，香港係一個嘈喧巴閉嘅九反之地，乜都嗌反對，乜都政治化，碰啱話事嗰個只係哎吔政治家，維持秩序嘅能力非常有限，政治爭拗基本上冇機會化解。至於京老爺點名要求煲呔曾化解嘅深層次矛盾，大家有眼睇，連興建高鐵都可以搞到亂七八糟一鑊粥，矛盾化解唔到，反而更加尖銳。

比較好彩嘅係，記者求問財政預算案，得到黃大仙第三十五籤，係一支中吉籤。雖然中吉唔算特別理想，之但係點都好過下下籤，直情要抹一額冷汗啦。

呢支中吉籤嘅古人係「唐僧取經」，籤文係咁樣講嘅：「天將降任此其人，筋骨先勞苦彼身，莫謂佳景來何易，貧窮富貴有前因。」

根據解籤先生詮釋，籤文意思係話預算案會有利民措施，但係驚喜不大，而且先難後易，起初會有批評，經過優化先至滿意。除此之外，財爺曾俊華必須慎防小人口舌。

功夫茶毫無疑問唔係正牌解籤先生，不過一見到「唐僧取經」，即刻靈光一閃，腦海之中彈出「糖曾寫經」四個字。糖，就係派糖糖；曾，就係曾俊華；寫經，當然就係撰寫財政預算案。

「糖曾寫經」算唔算穿鑿附會呢？冇辦法，呢個係普羅市民嘅主觀願望，即使穿鑿附會都係為民請命咁解啫。如果真係可以利民紓困，功夫茶唔介意咁做。

話時話，唐三藏取西經的確幾好意頭，取得佛經普度眾生吖嘛。再講吖，黃大仙大概知道曾俊華一度心臟病發，所以醒佢一句「筋骨先勞苦彼身」。至於「天將降任此其人」咯喎，嗯……會唔會……係唔係……財爺派完糖之後有得升職？當然啦，呢家嘢純粹靠估，天機有時好難參透，話唔定「降任」嘅意思係「降職」，咁就該煨。

點都好啦，既然黃大仙有言在先，大家不妨拭目以待，睇睇鬍鬚曾點樣寫呢份財政預算案。功夫茶有一個溫馨提示，財爺呀財爺，記住真係要寫得好啲喎，派糖唔好派得咁手緊，萬一寫得差，一旦犯眾怒，好多人張牙舞爪想食唐僧肉㗎！呢嗱，唔係一味靠嚇，解籤先生講㗎，慎防小人口舌吖嘛，出動口舌咪即係吞你落肚囉！